“21 аймгийн цом” лигийн тэмцээний улирлын тоглолтууд өндөрлөж энэ өдрүүдэд хасагдах шатны тоглолтууд “Спортын төв ордон”-д яюагдаж байна. Энэ өдрийн эхний тоглолт Play off-д зүүн бүсийн хоёрдугаар байраар шалгарсан А.Алтан-Очир дасгалжуулагчтай Сүхбаатар аймаг болон гуравдугаар байраар шалгарсан Дундговь аймгийн багуудын хооронд болсон юм.
Дундговь аймгийн багаас Г.Анар, Браун, Жэмс нар гайхалтай тоглолт үзүүлж төгсгөлийн 2 минут хүртэл 15 оноогоор хожиж байсан ч Сүхбаатар аймгийн багийн бүтэн талбайн хамгаалалт үр дүнгээ өгч үндсэн цаг 98:98-аар тэнцүү өндөрлөсөн юм. Тоглолтын нэмэлт цагт Дундговь аймгийн түлхүүр тоглогч Брауны алдаа 6 болж тоглолтыг чөлөөлснөөр багтаа том гарз учруулж улмаар Сүхбаатар аймгийн баг 105:106-аар буулгаж авсан.
Тоглолтын шилдгээр Сүхбаатар аймгийн хамгаалан тоглогч Карл Блэр 29 оноо, 8 удаа самбараас бөмбөг авч тодорсон юм. Ингэснээр Сүхбаатар аймгийн баг цуврал тоглолтыг 2:0 ээр тэргүүлж эхэллээ. Түрүүлж гурав хожсон баг нь цааш шалгарч бүсийн аваргын төлөө өрсөлдөнө.
О.ДАШНЯМ
