Швед улсад үргэлжилж буй бөмбөгтэй хоккейн “Б” зэрэглэлийн Дэлхийн аварга шалгаруулах тэмцээнд оролцож буй Монгол улсын шигшээ баг хэсгийн 2 дах ялалтаа авлаа.
Монголын баг өнөөдөр Японы багийг 10:2-оор “бут ниргэсэн” юм. Энэ өдөр манай түлхүүр тоглогчид болох легионерууд үүргээ сайн гүйцэтгэж “гоолын бороо” оруулсан. Тоглолтонд Роман Мурзин 3 гоол, Максим Айнсбруннер 2 гоол, Игорь Родионов 2 гоол, Болдбаяр 1 гоол, Шинэбаяр 1 гоол, багийн ахлагч Тамир 1 гоол хийжээ.
Өмнө нь Монголын шигшээ баг Японд 2 удаа хожигдоод байсан бол энэ хариугаа чанга авсан . Ийнхүү манай шигшээ баг хэсэгтээ 4 оноотой болж одоогийн байдлаар хэсгээ тэргүүлж байна. Энэ хэсгийн нөгөө тоглолтод Украйны баг Унгарыг хожсон тохиолдолд Монголын баг хэсгээс тэргүүн байраар шалгарах боломжтой юм.
Ингэснээр хасагдах шатанд “А” хэсгийн дөрөвдүгээр байраар шалгарах магадлал өндөр Эстоний багтай тоглох юм. Манай шигшээ баг өнөөдөр хэсгийн сүүлийн тоглолтоо 21:00 цагаас Унгарын багтай хийнэ. Унгарын шигшээтэй манай баг өмнө нь 5 удаа тоглож 2 хожиж 3 удаа хожигдож байсан.
О.ДАШНЯМ