ОХУ-ын Красноярск хотноо нээлтээ хийсэн алдарт бөх Иван Яриганы нэрэмжит чөлөөт бөхийн “Алтан Гранпри” тэмцээний эхний өдрийн барилдаанууд явагдаж өндөрлөлөө. Энэ өдөр эрэгтэйчүүдийн 57кг, 74кг, эмэгтэйчүүдийн 48кг, 58кг, 60кг, 69кг-ийн жингийн барилдаанууд явагдсан.
58 кг-ын жинд “Хилчин”-ий Э.Гантуяа эхний тойрогт МУГТ С.Цэрэнчимэдийг цэвэр ялаад, хоёрдугаар тойрогт эзэн орны Ходижат Муртазалиеваг 10:0 онооны харьцаагаар ялсан ч хагас шигшээ барилдаанд Киргизистаны Айсулу Туныбековад цэвэр ялагдаж хүрэл медалийн төлөө ОХУ-ын Мария Матушенког 7:0 хожсон юм.
60 кг-ын жинд “Хилчин”-ий З.Болортунгалаг эхний тойрогт гоц мөргөж, хоёрдугаар тойрогт О.Оюунтуяаг 7:4 онооны харьцаагаар хожсон. Гуравдугаар тойрогт ОХУ-ын бөх Динара Соликоваг цэвэр ялаад хагас шигшээ барилдаанд ОХУ-ын бөх Юлия Пронцевичид 0:7 онооны харьцаагаар ялагдаж хүрэл медалийн төлөө барилдах эрхтэй болсон. Тэрээр хүрэл медалийн төлөө АНУ-ын бөх Элиссон Маркензи Рагантай барилдаж цэвэр ялагдаж энэ удаа медальд хүрч чадсангүй. Энэ жинд хүч үзсэн нөгөө бөх ОУХМ Б.Шоовдор хоёрдугаар тойрогт ОХУ-ын Светлана Липатоваг 6:2 онооны харьцаагаар ялж гуравдугаар тойрогт Японы бөх Кацуки Сакагамид 0:10 онооны харьцаагаар ялагдаж дагах тойргийн барилдаанд ОХУ-ын Назира Аманзоловаг 5:0 онооны харьцаагаар хожиж медалийн төлөө хариуцлагтай барилдаанд Буриадын Жаргалма Цыреновад 0:5 онооны харьцаагаар дийлджээ.
69 кг-ын жинд барилдсан МУГТ О.Насанбурмаа эхний тойрогт ОХУ-н бөх Юлия Максимоваг 6:0-ээр, удаах тойрогт нутан нэгт Ш.Түмэнцэгийг 8:3 онооны харьцаагаар ялж хагас шигшээ барилдаанд ОХУ-ын Ксения Бураковаг цэвэр ялж аваргын төлөөх барилдаанд АНУ-ын Тамира Менсахтайд 4:8 онооны харьцаагаар хожигдож мөнгөн медаль хүртсэн. МУГТ О.Насанбурмаа Яриганы нэрэмжит тэмцээний алт, хошой мөнгө, хүрэл медальтай бөх боллоо.
Ш.Түмэнцэцэг нэгдүгээр тойрогт ОХУ-ын Анастасия Братчиковаг цэвэр ялж хоёрдугаар тойрогт МУГТ О.Насанбурмаад 3:8 онооны харьцаагаар хожигдож дагах тойрогт Юлия Максимоваг 10:0 ээр цэвэр ялж хүрэл медалийн төлөө барилдаанд ОХУ-ын Ксения Бураковаг 12:5-аар хожсон. Ийнхүү Ш.Түмэнцэцэг энэ тэмцээнээс гурав дах хүрэл медалиа авч байна.
Тэмцээний эхний өдрийн дүн 57 кг
1. Заур Угуев /ОХУ/
2. Артём Гебеков /ОХУ/
3. Нариман Испарилов /ОХУ/
3. Зелимхан Абакаров /ОХУ/
74 кг
1. Ахмед Гаджимагомедов /ОХУ/
2. Ацамаз Санакоев /ОХУ/
3. Радик Валиев /ОХУ/
3. Кахабер Хубежты /ОХУ/
Эмэгтэй чөлөөт бөх 48 кг
1. Юу Сусаки /Япон/
2. Дарья Лексина /ОХУ/
3. Милана Дадашева /ОХУ/
3. Миглена Селишка /Болгар/
58 кг
1. Айсулуу Туныбекова /Киргиз/
2. Вероника Чумикова /ОХУ/
3. Энхбатын Гантуяа /“Хилчин” спорт хороо/
3. Акиа Ханая /Япон/
60 кг
1. Кацуки Сакагами /Япон/
2. Юлия Пронцевич /ОХУ/
3. Жаргалма Цыренова /ОХУ/
3. Элиссон Раган /АНУ/
69 кг
1. Тамира Менсах /АНУ/
2. Очирбатын Насанбурмаа /“Алтай констракш” компани/
3. Элис Маналова /Азербайжан/
3. Шархүүгийн Түмэнцэцэг /“Хилчин” спорт хороо/
О.ДАШНЯМ