ОХУ-ын шилдэг тамирчин Иван Ярыгины нэрэмжит “Алтан Гранпри” тэмцээн Кроснаярск хотноо амжилттай үргэлжилж байна. Тэмцээний хоёрдах өдөр Монголын тамирчид өндөр амжилт үзүүлж 63 кг-д “Алдар” ОУХМ П.Орхон, 73 кг-д Уртнасан нар алтан медаль хүртсэн.
Эмэгтэйчүүдийн 53 кг-ын жинд Дэлхийн аваргын алт, хүрэл медальт Д.Отгонцэцэг нэгдүгээр тойрогт ОХУ-н бөх Наталья Малышеваг 10:0, хоёрдугаар тойрогт нутаг нэгт Э.Сумьяаг 10:0 онооны харьцаагаар хожиж хагас шигшээ барилдаанд эзэн орны бөх Оршуш Стальвираг 5:2 онооны харьцаагаар хожиж алтан медалийн төлөө барилдах эрхтэй болсон. Аваргын төлөө Японы бөх Маю Мукаидатай барилдаж 0:5 харьцаагаар хожигдож мөнгөн медаль зүүсэн. Энэ жинд өнгөрсөн оны улсын аварга “Алдар” спорт хорооны залуу тамирчин Г.Отгонжаргал өрсөлдөж нэгдүгээр тойрогт гоц мөргөж удаах тойрогт Н.Лхагвадуламыг цэвэр ялаад гуравдугаар тойрогт ОХУ-н бөх Любовь Сальниковад 4:12 онооны харьцаагаар хожигдож байсан ч гарыг нь хавчиж эргээд цэвэр ялсан. Хагас шигшээ барилдаанд Японы бөх Маю Мукаидад оноогоор цэвэр ялагдаж хүрэл медалийн төлөө ОХУ-н Екатерина Полещуктай өрсөлдөж 5:7-оор хожигдсон юм.
Дэлхийн аваргын мөнгөн медальт Э.Сумьяа эхлээд гоц мөргөж, хоёрдугаар спортын мастер Б.Хатантуулыг 11:0 онооны харьцаагаар ялж гуравдугаар тойрогт Д.Отгонцэцэгт 0:10 онооны харьцаагаар хожигдсон. Дагах тойрогт ОХУ-н Наталья Малышеваг ялж хүрэл медалийн төлөө Оршуш Стальвиратай барилдаж 11:1-ээр оноогоор цэвэр хожсон. Энэ медаль Э.Сумьяагийн “Алтан гранпри”-аас хүртэж буй гуравдах хүрэл медаль нь болж байна.
55 кг-ын жинд “Хасу Мегават” клубийн тамирчин А.Батцэцэг нэгдүгээр тойрогт Киргизын бөх Бекмет Нурланбекзуг 11:0, хоёрдугаар тойрогт ОХУ-н Александра Ниценког 10:0, гуравдугаар тойрогт ОХУ-н Нина Менкеноваг 10:4 онооны харьцаагаар хожсон. Хагас шигшээ барилдаанд Японы бөх Сае Нанжод 2:8 онооны харьцаагаар дийлдэж, хүрэл медалийн төлөө барилдаанд Э.Даваачимэгийг 2:1 онооны харьцаагаар ялсан юм.
63 кг-ын жинд “Алдар” спорт хорооны тамирчин энэ жилийн улсын аварга П.Орхон хоёрдугаар тойрогт ОХУ-н Анна Щербаковаг 15:4 онооны харьцаагаар цэвэр ялсан. Хагас шигшээ барилдаанд Японы бөх Аяка Итог 10:0 онооны харьцаагаар мөн цэвэр хожиж, аваргын төлөө эзэн орны Инна Тражуковагтай хүнд барилдаан хийж 7:6-р хожсон. Өнгөрсөн жил П.Орхон энэ тэмцээнд Японы домогт бөх Ичог ялж түрүүлж байсан билээ.
75 кг-ын жинд Г.Уртнасан хоёрдугаар тойрогт Киргизийн бөх Айпери Медет Кузуг 7:2 онооны харьцаагаар ялаад хагас шигшээ барилдаанд нутаг нэгт Ц.Баярзаяаг 10:3 онооны харьцаагаар хожсон. Тэрээр алтан медалийн төлөө ОХУ-н Алена Стародубцеваг 11:7 онооны харьцаагаар ялсан юм. Энэ нь түүний үзүүлсэн анхны том амжилт болж байна. “Хасу Мегават” клубийн тамирчин Ц.Баярзаяа хоёрдугаар тойрогт Казахстаны Ирина Казулинаг 10:0-ээр оноогоор цэвэр ялж хагас шигшээ барилдаанд Г.Уртнасанд 3:10 онооны харьцаагаар хожигдсон. Хүрэл медалийн төлөөх хариуцлагатай барилдаанд Киргизийн бөх Айпери Медет Кузуг цэвэр ялсан байна.
Эрэгтэй 125 кг-ын жинд ОУХМ Н.Золбоо зодоглож нэгдүгээр тойрогт ОХУ-ын Виталий Голоевийг 5:0 онооны харьцаагаар “машиндаж”, хоёрдугаар тойрогт ОХУ-н Анзор Болтукаевт 1:3-ээр ялагдсан. Дагах тойрогт ОХУ-н Адлан Ибрагимовыг 3:1 онооны харьцаагаар хожоод хүрэл медалийн төлөө барилдаанд Ираны тамирчин Сейдреза Моусавикатай 2:2 онооны харьцаагаар тэнцэж, сүүлд оноо авснаараа ялалт байгууллаа.
О.ДАШНЯМ
