.jpg)
Оюутны өвлийн спортын 28 дугаар “Универсад-2017” наадам энэ сарын 29-ны өдөр Казахстаны Алмата хотын “Алмата Арена” цэнгэлдэх хүрээлэнд нээлтээ хийлээ. “Универсад-2017” наадамд таван тивийн 54 орны 3000 орчим тамирчид 125 багц медалийн төлөө өрсөлдөх юм.
Тус наадамд Монгол Улсыг төлөөлж Б.Ачбадрах, У.Батжаргал, Б.Амарсанаа, Б.Дэлгэрмаа, Ч.Отгонцэцэг, А.Энхтуул нар гүйлтийн цанын тэмцээнд оролцож байгаа бол тэшүүрийн төрөлд М.Мөнх-од, Я.Зоригтбаатар, Б.Тулга, А.Зул нар өрсөлдөх юм.
Наадмын эхний өдөр уулын цана, биатлон, гүйлтийн цана, мөсний хоккейн төрлийн тэмцээнүүд явагдсан юм. Монголын тамирчид гүйлтийн цанын эрэгтэйчүүдийн ганцаарчилсан төрлийн 10км, эмэгтэй 5км-ийн зайд өрсөлдсөн. Эмэгтэйчүүдийн 5км-ийн төрөлд 62 тамирчин өрсөлдөж Ч.Отгонцэцэг 16:18.3 секундийн амжилтаар 26 дугаар байрт шалгарсан юм. Мөн энэ зайд А.Энхтуул 17:11.7 секунд гүйж 41 дүгээр байр Б.Дэлгэрмаа 18:31.5 секундийн амжилтаар 52 дугаар эзэлсэн байна.
Эрэгтэйчүүдийн 10км-ийн зайн уралдаанд 87 тамирчин уралдсанаас манай тамирчин Б.Ачбадрах 28:02.02 амжилттаар 41 дүгээр байр, Б.Амарсанаа 29:40.05 амжилтаар 74 дүгээр байр, У.Батжаргал 30:22.5 амжилтаар 79 дүгээр байрт шалгарсан амжилт үзүүлээд байна.
Монголын тамирчдын тэмцээн цанын сонгомол болон тэших техниктэй холимог уралдааны эрэгтэй 10км, эмэгтэй 5км-ийн уралдаанаар үргэлжилнэ. Мөн тэшүүрийн тамирчид эрэгтэй 1500 метр болон 5000 метрийн зайд уралдах юм.
О.ДАШНЯМ
