Энэ сарын эхний барилдаан нь 02-р сарын 05-нд хүнсний манлай үйлдвэр “Талх-Чихэр“ ХК-ны нэрэмжит аймаг цэргийн цолтой болон залуу бөхчүүдийнх байх юм.
Тус барилдааныг 2006 оноос хойш тасралтгүй зохион байгуулсан бөгөөд анхны 2 барилдаанд нь Улсын начин Ш.Тогтохбаяр аймгийн арслан цолтойдоо түрүүлж байсан юм. Барилдаанд түрүүлсэн бөхчүүдээс аймгийн арслан О.Хангайгаас бусад нь бүгд улсын цолонд хүрээд байгаа юм.
Мөн энэ сарын 12-нд “Их Монгол” хэмээх Шаравжамц аваргын мэндэлсний 140 жилийн ойд зориулсан Улс, аймгийн алдар цолтой 224 бөхийн барилдаан болно. Сар шинийн баярт зориулсан барилдаанууд 23-наас буюу сумын цолтон болон залуу бөхчүүдийн барилдаанаар эхэлнэ.
2-р сарын 24-нд “Дашчойлин” хийдийн нэрэмжит "Майдар бурханы авшиг түгээх" аймаг цэргийн цолтой 256 бөхийн барилдаан 2-р сарын 25-нд Сар шинийн баярт зориулсан өсвөр бөх болон нийтийн монгол шандастаны барилдаан 2-р сарын 26-нд XVII жарны "Алтан унжлагат" хэмээх гал тахиа жилийн Сар шинийн баярт зориулсан Улс, аймгийн алдар цолтой 256 бөхийн уламжлалт барилдаанууд тус тус зохиогдох хуваарьтай байна.
О.ДАШНЯМ
