Монголын Үндэсний сагсан бөмбөгийн холбооноос зохион байгуулж буй 21 аймгийн лигийн тэмцээний хасагдах шатны тоглолтууд энэ өдрүүдэд үргэлжилж байна.
Баруун бүсээс шалгарсан Д.Мөнхтүвшин ахлагчтай “Ховд Алтайн Аргал” баг О.Цэлмэг ахлагчтай “Хөвсгөл нэг үе” багуудын цувралын дөрөв дэх тоглолт явагдсан юм. Тус тоглолтод “Хөвсгөл нэг үе” баг хожигдох эрхгүй тоглосон. Учир нь тэд цувралд 2:1-ээр ялагдаж байсан юм. Тоглолтын эхлэлийг “Хөвсгөл нэг үе багийн залуус амжилттай тоглож Чой Ру Ри, О.Цэлмэг нар амжилттай тоглож эхний хагасыг онооны давуутай өндөрлүүлсэн.
Тоглолтын хоёрдугаар хагасд Ховдын багийн легонер Аллен Томас, залуу тамирчин Б.Болдбаатар нар гайхалтай тоглолт үзүүлж үндсэн цагт 103:96-аар буулгаж авснаар тэд баруун бүсийн аваргын төлөө ОУХМ Э.Цэвэлдоржоор ахлуулсан “Алтан Дорнод Архангайн дайчид” багтай тоглохоор боллоо. Ховдын багийн төвийн тоглогч П.Болортулга энэ өдөр хамгаалалт довтолгоонд жигдхэн сайн тоглолт үзүүлж багаа хожилд хүрэхэд том нөлөө үзүүлсэн. Мөн тэд торгуулийн шидэлт 34 шидэж 28-ыг нь амжилттай болгосон байна.
Тоглолтын өмнө Хөвсгөл нэг үе багийн хамгаалагч Г.Чинбатад МҮСБХ-оос улирлын шилдэг хамгаалан тоглогчийн шагналыг гардуулсан. Тэрээр энэ улиралд 10,7 оноо, 9,1 самбараас бөмбөг авалт, 2,5 хаалт дунджилж байсан юм.
О.ДАШНЯМ
