Францын Парис хотноо ОУЖБХ-оос зохион байгуулдаг жудо бөхийн Гранд Слам тэмцээн өнгөрсөн амралтын өдрүүдэд болж өндөрлөлөө.
Монгол Улсаа төлөөлж 13 жудоч оролцсоноос эмэгтэйчүүдийн 48 кг-ын жинд МУГТ.М.Уранцэцэг мөнгөн медаль, эрэгтэйчүүдийн +100 кг-ын жинд залуучуудын Дэлхийн аварга ОУХМ.Ө.Дүүрэнбаяр хүрэл медаль, 66 кг-ын жинд энэ оны насанд хүрэгчдийн улсын аварга ОУХМ Г.Хэрлэн 5-р байр, 81кг-н жинд ОУХМ Н.Дагвасүрэн долоодугаар байрт шалгарсан амжилт үзүүллээ.
Тус тэмцээнд 61 орны тамирчид оролцсон бөгөөд жудогийн эх орон Японы тамирчид 7 алт, 4 мөнгө, 2 хүрэл медаль хүртсэн амжилтаар тэргүүлсэн бол БНСУ-ын тамирчид 2 алт, 1 мөнгө, 2 хүрэл медаль хүртэж дэд байрт жагссан байна.
Харин Монгол Улсын тамирчид 1 мөнгө, 1 хүрэл медаль хүртсэн амжилтаар есдүгээр байрт орлоо. Олон улсын жудо бөхийн холбооноос зохион байгуулах дараагийн тэмцээн энэ сарын 24-26-ны өдрүүдэд Германы Дьюсэлдорф хотод болно.
О.ДАШНЯМ
