Европын хөлбөмбөгийн холбооны хамгийн нэр хүндтэй тэмцээн “Аваргуудын лигийн” шөвгийн 16-гийн эхний тоглолтууд өнгөрсөн шөнө явагдлаа. Энэ өдөр Францийн “ПСЖ” талбайдаа Испанийн “Барселона”-г хүлээж авч, 4:0-ээр бут ниргэв. Тоглолтын 18, 71 дэх минутад Аргентин тоглогч Анхель Ди Мария хоёр гоол оруулсан.
Харин 40 дэх минутад “ПСЖ”-ын “шинэ цэрэг” Герман тоглогч Юлиан Дракслер гоолдсон бол Урагвай довтоглогч Кавани 71 дэх тоглолтын цэгийг тавьж нэгэн гоёмсог гоолоор Барселонагийн хаалгач Тер Штегенийг мялаасан. Эдисон Каванигийн хувьд энэ улирлын Аваргуудын лигт оруулж буй 7 дах гоол нь энэ юм. Хоёр багийн хариу тоглолт 14 хоногийн дараа “Барселона”-ийн “Камп Ноу” цэнгэлдэхэд явагдана. Лиус Энрикэгийн баг өрсөлдөгчөө 4 гоолын илүүтэйгээр хожиж дараагийн шатанд шалгарах хүндхэн даалгавартай гэртээ харьж байна.
Энэ өдөр Германы “Бориусса Дортмунд” клуб Португалын Бенфикагийн талбайд зочилж Грек довтлогч Митроглугийн гоолоор хожигдол хүлээлээ. Германы баг Марко Ройс, Абумяанг, Андре Шурлэ тэргүүтэй шилдэг тоглогчдоо талбайд гаргасан ч Бенфигагийн хаалганы торыг хөдөлгөж чадалгүй 90 минутыг дуусгасан юм. Багуудын хариу тоглолт 14 хоногийн дараа “Бориусса Дортмунд”-ын “Сигнал Элуна Парк” цэнгэлдэх хүрээлэнд явагдана.
О.ДАШНЯМ