Бөхийн чөлөөт барилдааны 2017 оны эрэгтэйчүүдийн "Дэлхийн цом"-ын тэмцээн өчигдөр Иран улсад нээлтээ хийлээ.
Монгол Улсын шигшээ баг тэмцээний “Б” хэсэгт орсон бөгөөд эхний барилдаанаа Энэтхэгийн багтай хийж 7:1-ээр ялсан юм.
Хэсгийн хоёрдах барилдаанаа Туркийн багтай хийж 5:3-аар хожигдсон. Монголын баг өнгөрсөн жил “Дэлхийн цом”-ын тэмцээнд Туркийн багтай таарч 6:2-оор хожиж байсан амжилтаа бататгаж чадсангүй.
Монгол Улсын баг хэсгийн сүүлийн барилдаанаа тэмцээнийг зохион байгуулагч Ираны багтай хийж 7:1-ээр хожигдсон. Манай багийн нэг ялалтыг олон улсын хэмжээний мастер Батчулууны Батмагнай авчирсан юм.
О.ДАШНЯМ
