Японы Саппаро хотноо болж буй Азийн өвлийн наадмын хоккейн төрөлд өрсөлдөж буй Монголын шигшээ баг хэсгийн хоёр дах тоглолтондоо Сингапурын багийг 8:0-ээр хожлоо.
Тоглолтын эхэнд Сингапурын багийн хамгаалагч Р.Ловелл алдаа гаргаж талбайг орхисноор манай багт давуу талыг олгосон. Улмаар нэдүгээр үеийн төгсгөлд Монголын багийн Б.Болдбаяр, Ж.Баярсайхан нар гоол оруулж тэргүүлж өндөрлүүлсэн.
Хоёрдугаар үед манай баг илт давуу тоглож, И.Гэрэлт хоёр гоол оруулж, П.Батзаяа, З.Батгэрэл нар тус бүр нэгийг нэмж хийснээр 6:0-ээр тэргүүлж эхэлсэн. Тоглолтын төгсгөлийн үед Монголын шигшээ давуу байдлаа хадгалж П.Батзаяа, Б.Болдбаяр нар гоол оруулж 8:0-ийн харьцаатайгаар Сингапурыг “бут ниргэв”.
Өнөөдөр Монголын шишээ баг 18:00 цагаас Арабын Нэгдсэн Эмиратын шигшээ багтай хэсгийн 3 дах тоглолтоо хийнэ.
О.ДАШНЯМ