Монголын Үндэсний бөхийн холбооноос зохион байгуулдаг сумын цолтон болон залуу бөхчүүдийн энэ сарын барилдаан энэ сарын 23-ны өдөр болж өндөрлөлөө.
Сар шинийн баярт зориулсан барилдаан Увсын Н.Ширчинхүү, Өвөрхангайн Б.Цэрэндандагва, Завханы Т.Хайдавдорж, Хэнтийн Г.Бадрах нараар манлайлуулсан хүчит 480 бөх зодоглосноос Хэнтий аймгийн Өмнөдэлгэр сумын харьяат сумын заан Даваасүрэнгийн Алтанцоож түрүүлж, Өвөрхангай аймгийн Бүрд сумын харьяат сумын заан Гомбодоржийн Цэнддорж үзүүрлэсэн юм.
Их шөвөгт Өвөрхангай аймгийн Хархорин сумын харьяат сумын заан Б.Бямбадорж, Төв аймгийн Баян сумын харьяат сумын заан Жамсрандорж нар шалгарсан. Энэхүү барилдааны зүүний манлайд гарсан Увс аймгийн сумын заан Н.Ширчинхүү дөрөвийн даваанд Архангайн Сэнгэдоржид унасан бол барууны манлай Б.Цэрэндагва 7-гийн даваанд Өвөрхангайн Б.Бямбадоржийг амлаж барилдаад давхар тохуулж өвдөг шороодсон. Мөн Дархан аварга А.Сүхбатын хүү сумын заан Хангай энэ өдөр Хэнтийн О.Эрдэнэбат, Завханы Т.Хайдавдорж нарыг 4,5-ын даваанд хаяад сумын заан Г.Цэнддоржид унасан.
О.ДАШНЯМ
