Теннисний дээд лигийн эхний тоглолт Мон-Лаа багийн ялалтаар өндөрлөлөө. Цэцэн-гэрс багийн эрэгтэйчүүд 4 хожиж, Мон-Лаа багийн эмэгтэйчүүд 4 хожиж, эцсийн шийдвэрлэх 9 дэх тоглолтыг сугалааны дагуу Цэцэн гэрс багийн ахлагч, улсын аварга Б.Баярмагнай Мон-Лаа багийн тоглогч, улсын аварга Энхсайхантай хийлээ.
Энхсайхан эхний хоёр партыг хожсон ч, 3,4 дэх партад хожигдож, эцсийн 5 дахь тоглолт гарсан нь үзэгчдийг өндөлзүүлсэн. 5 дахь партад Б.Баярмагнай илүүрхэж 9:6 -аар хошуучилж явсан ч Энхсайхан гүйцэж барьж, улмаар 15:13 харьцаагаар маш чухал хожлыг Мон-Лаа багтаа авчирлаа.
Ерөнхий харьцаа 1:0 болоход Мон-Лаа багийн залуу тамирчин, дэд мастер Индра, Должинзуу нар тус бүр хоёр хоёр хожсон нь багийн ерөнхий амжилтад нөлөөллөө гэж Мон-Лаа багийн дасгалжуулагч С.Галбадрах хэллээ.
Хэдийгээр Мон-Лаа багийн туг болсон ОУХМ Э.Лхагвасүрэн хоёр хожигдсон ч баг нь эхний хожлоо авч чадсан нь тус багийн тоглогчид туйлын жигд байгааг илтгэлээ.
Маргааш буюу ням гарагт өглөө 10.00 цагаас ОЧ клубт хариу тоглолт болно. Хэрэв Мон-Лаа хоёр дахь хожлоо авч чадваас Ширээний теннисний Дээд Лигийн аваргаар тодрох болно. Тэнцсэн тохиолдолд нэмэлт 3 дахь тоглолтыг маргааш үдээс хойш хийх нь.
А.ЦЭРЭНДУЛАМ
