.JPG)
Монголын Үндэсний Олимпийн Хорооны ээлжит Их Хурлын тов энэ сарын сүүлийн 7 хоногт таарчээ. Олимпийн хороог удирдах хүсэлтэй хүмүүс нэрээ дэвшүүлэх үйл ажиллагаа хэдийнээ эхэлсэн байна. Нэр дэвшүүлэх үйл ажиллагаа нээлттэй, гэхдээ нэрийг нь тодорхой хугацаанд нууцлах журам гаргажээ. Ур журмын дагуу энэ сарын 9-ний өдөр дугтуйг задалж, хэн хэн МҮОХ-ны ерөнхийлөгчид өрсөлдөх хүсэлтээ илэрхийлснийг зарлах юм байна.
Одоогоор Завхан аймаг Загдсүрэн, Сайхансамбуу, Архангай аймаг Ганзориг, Дорноговь аймаг Баясгалан гэсэн төлөөлөлтэй байгаа гэсэн мэдээлэл ам дамжин яригдаж байна. Загдсүрэнгийн хувьд МҮОХ-ны ерөнхийлөгчөөр сүүлийн 20-иод жил тасралтгүй ажиллаж буй туршлагатай нэгэн. Хамт олны хүсэлтээр дэвших болсон гэх мэдээлэл бий. Харин Сайхансамбуу бол УИХ-ын гишүүн, Боксын холбооны ерөнхийлөгчөөр ажиллаж байсан. Боксын холбоонд авсан газар дээрээ хувийн эдлэн барьсан гэх хэл ам дагадаг, түүнийг. Түүний ард олимпийн хорооны одоогийн удирдлагыг эсэргүүцэгч нар байгаа гэх мэдээлэл бий. Ганзоригийн хувьд Үйлдвэр Худалдааны сайд, ГОК-ын ерөнхий захирал, Боксын Холбооны ерөнхийлөгч зэрэг албан тушаал, сонгуульт ажлыг эрхэлж байсан. Түүний үед Монголын Боксын Холбоо хөгжлийнхээ оргилд хүрсэн түүхтэй. Харин Баясгалангийн хувьд Боди компаниар овоглодог. Өнгөрсөн хоёр ч удаагийн Их хурлаар өрсөлдсөн боловч амжилт олоогүй. МҮОХ-ны дэд ерөнхийлөгчийн сонгуульт албан тушаалтай. Энэ удаа дахин өрсөлдөхөөр зэхэж буй гэж түүний талаар ярьж байна. Их аварга Дагвадорж энэ албан тушаалыг маш их сонирхож байсан. Харин Чөлөөт Бөхийн Холбоогоо орхисноос хойш энэ тухай огт дурсахгүй байх болсон. Тиймээс маш том өрсөлдөгч өрсөлдөөний талбарыг орхисон гэж хэлж болно. Хоёрхон хоногийн дараа хэн хэн дэвших болсныг Та бид мэдэх нь ээ.
ЭХ СУРВАЛЖ : SPORTLIFE.MN
