Нүүр   /   Спорт

2017-03-16  

Хүмүүс дурлаад буй МҮОХ-ны ерөнхийлөгчийн суудал ямар үнэ цэнэтэй вэ? гэж асуух цаг болжээ. Өөрийн ордонтой, гадаад дотоод харилцаа өргөжсөн, санхүүжилттэй, гаднын хөрөнгө оруулалт сайтай, байгууллага нь олон улсын тавцанд нэр хүндтэй зэрэг нь анхаарал татах нэг үндэслэл гэж хэлж болох. Олон улсын олимпийн хороог төлөөлөх цорын ганц байгууллага. Удирдлага нь маш тогтвортой. Улсын их хурлын гишүүн болсноос МҮОХ-ны дарга болох нь нэр хүндтэй гэх үзэл давамгайлах болсонтой ч холбоотой байхыг үгүйсгэхгүй. Статус нь Монголын төр, засгийн хэнээс ч хамааралгүй учир энэ байгууллагыг удирдахыг хүсдэг хүмүүсийн тоо нэмэгдсэн. Тиймээс ч энэ жил 7 хүн ерөнхийлөгчид нэр дэвшиж буйгаа илэрхийлсэн. Энэ долоон хүн хэн бэ? гэдгийг хамтдаа тандая.

Яйчилын БАТСУУРЬ : Дорнын говиос улсын их хуралд сонгогдож байсан. Гадаадад олон жил ажиллаж амьдарсан. Гишүүнээр сонгогдохоос өмнө санхүүгийн боломжтой болсон гэж ойр тойрныхон нь үздэг. УИХ-ын гишүүнээс буусны дараа АН-ыг засаг барих үед Монголын эдийн засгийн зүрх нь болсон Эрдэнэс Таван Толгой ХК-ийн гүйцэтгэх захирлаар ажиллаж байсан. АН-ын экс дарга Н.Алтанхуягийн багийн гишүүн гэж түүнийг үздэг. Эндээс түүний карьер намтарт хар толбо суулгасан үе эхэлдэг. "Аав"-ынд хоригдож байсан. Шалгах явц нь хараахан эцэглэгдээгүй. Спорттой холбогдох сэжим нь шагайн харваа. Шагайн харваагаар улсын үлэмж дархан мэргэн цолд хүрсэн. Монголын шагайн холбоог сүүлийн 8 жил удирдаж буй. Тэрбээр МҮОХ-ны дарга болох хүсэлтээ илэрхийлсэн. Спортод ойрхон, бизнес эрхэлдэг, дээр нь хууль тогтоох байгууллагад ажиллаж байсан туршлагатай, англи хэлтэй гэдгээ өөрийн давуу тал гэж үзэж буй бололтой. Түүнд хуулийн байгууллагад шалгуулж буй гэдэг нь өрсөлдөхөд нь саад болж магадгүй гэх үндэс бий. Түүнийг сул өрсөлдөгч гэхгүй ч, хүчтэйд нэрлэхгүй.

Лувсангийн ХАЛТАР : Аль нэг дарга гэсэн сэтэртэй хүн холбооны ерөнхийлөгч болдог гэсэн батлагдаагүй хууль бий. Энэ л замаар Гимнатикийн Холбооны ерөнхийлөгч болсон. Эрхэлж буй ажил нь УБТЗ-ийн орлогч дарга. Өөрийн гэсэн тээвэр зуучлалын компанитай гэдэг. Бизнесийн хувьд хөл дээрээ тогтсон. Чөлөөт бөхөөр бага залуудаа хичээллэж, дэд мастер цолонд хүрсэн. Гимнастикийн холбооны ерөнхийлөгч гэдгээрээ дөрөөлж МҮОХ-ны ерөнхийлөгчид нэр дэвшсэн. Хамгийн сул өрсөлдөгч гэж түүнийг тооцож байна.

Чойжгаваагийн ЗОРИГТБААТАР : Зоригтбаатарыг спортын хүрээлэл андахгүй. Биеийн тамир спортын хорооны даргаар залуу зандан насандаа ажиллаж явсан. Судлаач, эрдэмтэн. Яг одоогоор Төрөлжсөн сургалттай биеийн тамир спортын дунд сургуулийн захирлаар ажилладаг. Ах Наранбаатар нь бас БТСХ-ны даргаар ажиллаж байсан. Хэл усны хувьд Халтар, Батсуурь хоёрт хүрэхгүй байх талтай. Гол өрсөлдөгчид түүнийг тооцохгүй.

Цэвэгмидийн БАТ-ЭНХ : Бат-Энх бол амьдралаа спортын хөгжилд зориулсан хүний нэг мөн. Волейбол буюу гар бөмбөгийн спортыг Монголд хөгжүүлэхэд үнэтэй хувь нэмэр оруулж буй зүтгэлтэн. Волейболын холбооны хөгжлийн сүүлийн 16 жил түүнтэй салшгүй холбоотой. Тэрбээр холбооны ерөнхий нарийн бичгийн даргаар ажиллахдаа хэд хэдэн удаа олон улсын тэмцээнийг эх орондоо амжилттай зохион байгуулсан сайн менежер гэж түүнийг тооцож болох. МҮОХ-ны ерөнхийлөгчид өрсөлдөх зөв зүйтэй нэр дэвшигч гэж түүнийг үзэж болно гэж спортынхон дүгнэж байна.

Чимиддоржийн БАТ-ЭРДЭНЭ : МҮОХ-ны одоогийн удирдлагыг олон жилийн турш хурцаар шүүмжлэгч. Эсэргүүцлээ тэмцэл болгож , "Олимпизмийг аврах хөдөлгөөн"-ийг ч боксын Баярсайхан, сэтгүүлч Н.Тамир нарын хамт байгуулсан. Өөрөө дэвших болсон нь өнөөгийн ерөнхийлөгч Загдсүрэнг эсэргүүцсэндээ хийсэн алхам гэж ойр тойрныхон нь дүгнэж байна. Даамын холбоог хариуцдаг. Өрсөлдөгчийн хувьд хүчтэйд тооцохгүй.

Дэмчигжавын ЗАГДСҮРЭН : Эмч мэргэжилтэй. Отгонбилэг агсны хүн гэсэн тодотголтой байсан. Маш зөөлөн аядуу зантай. МҮОХ-г өнөө зэрэгт хүргэсэн гавьяа бол түүнийх гэдэгтэй маргаж болохгүй. Бат-Эрдэнэ нарын гомдлын мөрөөр хууль хүчний байгууллагад шалгагдаж байсан. Хөрөнгө мөнгө идсэн уусан, тусламжийн мөнгийг шамшигдуулсан гэдэг нь шалгалтаар тогтоогдоогүй. Ерөнхийлөгчийнхээ ажлыг гүйцэтгэж буй. Хэрвээ МҮОХ-ны дүрмэнд харшлахгүй гэж үзвэл, МҮОХ-ны ерөнхийлөгчид нэр дэвшигчдийн дундаас хамгийн хүчтэй өрсөлдөгч гэж үздэг.

Энэбишийн МӨНХ-ОЧИР : Үе дамжсан улс төрч. Аав нь Улаанбаатар хотын дарга, УИХ-ын дарга, нам төрийн өндөр зүтгэлтэн байсныг нийгмээрээ мэднэ. Хүү нь аавыгаа залгамжилж Булган аймгаас УИХ-д сонгогдож байсан түүхтэй. Спортод тэр дундаа буудлагын спортод дуртай. Тиймээс ч Буудлага, Биатлан болон Самбо бөхийн холбооны ерөнхийлөгчөөр зэрэг ажилладаг. Ирээдүйтэй удирдагч гэж түүнийг спортынхон үнэлдэг. Маш зөв бөгөөд зөөлөн сэтгэлтэй хүн гэж ойр тойрныхон нь түүнийг хүндэлдэг. Яг одоогоор МҮОХ-ны 7 нэр дэвшигчээс хамгийн хүчтэй, хамгийн боломжтой нь Мөнх-Очир гэж спортын салбарынхан дүгнэж байна.

 

Тоймч Ц.ЭНХБАТ

АНХААРУУЛГА : Уншигчдын бичсэн сэтгэгдэлд CONTROL.MN хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 77008912 утсаар хүлээн авна

ГАДААД УЛСЫН АЖИЛЧИДАД ХЯЗГААР ТОГТООХГҮЙГ ТА ДЭМЖИЖ БАЙНА УУ?

ТИЙМ

ҮГҮЙ

Санал өгөх