.JPG)
Олон улсын Ширээний Теннисний Холбооны календарчилсан тэмцээн болох Зүүн Өмнөд Азийн бүсийн тэмцээнийг МШТХ амжилттай зохион байгууллаа. Нийт 4 улсын баг оролцохоос Хойд Солонгос улсын эрэгтэй, эмэгтэй баг тодорхой шалтгааны улмаас ирээгүй. Тиймээс Тайван, Макао, Монгол улсын баг тамирчдын хооронд өрсөлдөөн өрнөсөн. Тайваны баг Монгол, Макаогийн багийг 3:0-ээр хожиж хэсгээсээ нэгээр шалгарсан.
.jpg)
Харин хоёроор гарахын төлөөх ширүүн тэмцэл Монгол-Макаогийн багийн хооронд өрнөсөн. Дэд мастер, насанд хүрэгчдийн улсын аваргын 2017 оны хүрэл медальт Ундрамаар ахлуулсан Мөнхнаран, Мөнхчимэг нарын охидын баг Макоагийн багийг 3:2 харьцаагаар буулган авав. Охидын багаас дэд мастер Ундрам 2 хожиж, гуравдугаар ракет Мөнхчимэг 1 хожиж багаа хожилд хүргэв.
Харин хөвгүүдийн багийн хувьд шалгарах бүрэн боломжтой байсан ч 3:2-оор ялагдаж тэмцээнээ орхих болов. Гараагаа тун тааруухан эхэлсэн. 1,2-р ракет хожигдсоноор харьцаа 0:2 болсон. Гуравдугаар ракетаар тоглосон Баянхонгорын Баттөмөр шийдвэрлэх 3-р тоглолтыг хожиж, тоглолтыг эргүүлсэн гэж хэлж болно. 4 дэх тоглолтыг улсын аваргын мөнгөн медальт Эрдэнэбаяр хожиж харьцааг 2:2 болгож тэнцүүлсэн ч шийдвэрлэх 5 дахь тоглолтыг алдав. Лхагва-Эрдэнэ шийдвэрлэх 5 дахь тоглолтыг 2:0 харьцаагаар хошуучилж эхэлсэн ч төгсгөлийг хийж чадалгүй, теннисчидийн хэллэгээр "гучингуравдуулав". Энэ бол дараалан 3 хожигдсон гэсэн үг. Ганц хожил нэмж авч чадсангүй.
Ийнхүү нутагтаа болсон тэмцээнээс Монголын охидын баг эрхээ авч, хөвгүүд гунигтайгаар хасагдлаа. Ундрам, Мөнхнаран, Мөнхчимэг Өмнөд Солонгосын Сөүл хотод зохиогдох 16-18 насны өсвөрийн теннисчидийн багийн Азийн Аварга Шалгаруулах Тэмцээнд оролцох эрхээ Тайваны охидын хамт халаасаллаа. Өнөөдөр "Mongolia cup- 2017" тэмцээн хоёрдох өдөр үргэлжилнэ.
.JPG)
