Голландын цомын тэмцээний энэ оны аваргаар “Витес” клуб шалгарлаа. Тэд аваргын төлөө Голландын шилдэг багуудын нэг “АЗ Алкмаар” клубийг 2:0-ээр буулгаж авсан юм.
Шигшээ тоглолт Роттердам хотын “Фейеноорд” стадионд болж Рикки ван Волфсвинкел 81 болон 88 дахь минутанд гоолдож багтаа цом авчирсан байна. Ингэснээр “Европа лиг”-ийн урьдчилсан шатнаас өрсөлдөх эрхтэй болж байна.
“KNVB Cup” буюу Голландын хөлбөмбөгийн АШТ-ний түүхэнд “Аякс” клуб хамгийн олон буюу 18 удаа түрүүлсэн бол “Фейеноорд” 12, “ПСВ Эйндховен” клуб 9 удаа түрүүлж байсан юм. Тэдний араас энэ жилийн дэд аварга “АЗ Алкмаар” 4, “Твенте” 3, Унтрахт 3 удаа хүртэж байжээ. 125 жилийн түүхтэй “Витес” клубийн энэ амжилт нь багийн түүхэн дэх анхны том цом болж байна.