Удаах тоглолт Увс Нуур болон Сүхбаатар Залуучуудын Шигшээ гэсэн залуу бүрэлдэхүүнтэй багуудын хооронд өрнөлөө. Хүснэгтийн сүүлийн байранд яваа эдгээр багуудын хувьд плэй-оффт тоглох боломжтой 6-р байрны төлөө хэрэгтэй хожлоо авах ёстой тоглолт байлаа.
Солилцооны цонхоор Увс Нуур багийн хувьд Харцага багт тоглож байсан легионер Jordan Hill-г авсан бол, Залуучуудын шигшээ баг шилдэг залуу тоглогчид болох П.Мөнх-Оргил, Адьяасүрэн, Анужин нарыг эгнээндээ нэгтгэжээ.
Залуу бүрэлдэхүүнтэй 2 баг эхнээсээ тун ширүүн өрсөлдсөн. Энэ хожлыг авбал плэй-оффын сүүлийн байрлал болох 6-р байр руу дэвших боломжтой байсан Увс Нуур баг тоглолтын 4-р үеийн эхлэлийг тун сайн хийлээ. Тэднээс Л.Болд 25 оноо, Kim Chon IL 24 оноо, Jordan Hill 23 оноо, Мөнхбаяр 13 оноо, 17 самбар авчээ. Ингэснээр тоглолтын цаг дуусахад 3 минут үлдээд байхад тэд 88-75 харьцаатай, 13 оноо илүү гарч чадсан.
Гэсэн ч сүүлийн гурван минутанд Залуучуудын шигшээ багийн хамгаалалт эсрэг багтаа ердөө 2 оноо алдлаа. Харин өөрсдөө 15 оноо авсан, тэр дундаа Залуучуудын шигшээ багийн тоглогч Б.Наранбаатар маш чухал үед алдаа авч,2 торгуулиа амжилттай шидсэнээр, үндсэн цаг 90-90 харьцаатай тэнцээгээр өндөрлөсөн.
Харин нэмэлт цагийн эхлэлийг Залуучуудын шигшээ багийн шинэ тоглогч, саяхан болж өнгөрсөн U18 насны УАШТ-ны шилдэг тоглогч П.Мөнх-Оргил гайхалтай хийж, дараалсан 7 оноо авлаа. Ингэснэээр тэрээр энэ өдөр багаа тэргүүлж, 30 оноо, 8 самбар авч, тун ирээдүйтэй залуу тоглогч гэдгээ харууллаа. Мөн Б.Наранбаатар 20 оноо, 9 самбар, Золбаяр 18 оноо, 6 оновчтой дамжуулалт, Дамдинсүрэн 16 оноо, 14 самбар авчээ.
Улмаар нэмэлт цагт 101-97 харьцаатай Сүхбаатар Залуучуудын шигшээ баг тун чухал хожил авлаа. Ингэснээр тэд плэй-оффын өрсөлдөөнд хэвээрээ үлдэж байгаа юм.
Үндэсний супер лигийн улирлын тоглолтууд ирэх пүрэв гарагт 3 тоглолтоор үргэлжлэнэ. Эхний тоглолт Альянс Тех Харцага болон Ховд Мон Алтиус, удаахь тоглолт Төв Ургац болон SBL Хасын Хүлэгүүд, 3 дахь тоглолт Архангай Алтан Дорнодын Дайчид болон Увс Нуур багуудын хооронд өрнөнө. Лигийн хүснэгтийг тэргүүлж байгаа шилдэг багуудын тулаан энэ пүрэв гарагт өрнөнө.
Эх сурвалж : МҮСБХ