Сагсан бөмбөгийн Үндэсний Супер Лигийн улирлын тоглолтууд дуусах тун дөхөж байна. Өчигдөр лигийн хүрээнд 2 тоглолт явагдлаа. Эхний тоглолт Супер лигийн хүчтэй өрсөлдөгчид болох SBL Хасын Хүлэгүүд болон Альянс Тех Харцага багуудын хооронд өрнөлөө.
SBL Хасын Хүлэгүүд баг сүүлийн 2 тоглолт дараалсан ялалт авч, тоглолт нь тун жигдрээд байгаа. Энэ өдөр ч үүнийгээ батлан харууллаа. Тэднээс ОУХМ Б.Билгүүн бэртлээс бүрэн эргэн ирсэн гэдгээ харуулж, Харцагуудын эсрэг 36 оноо, 6 самбар, 5 оновчтой дамжуулалт гэсэн үзүүлэлтээр багаа тэргүүллээ. Түүний араас легионер тоглогчид болох Butler 18 оноо, Davis 15 оноо авсан бол О.Сэргэлэн 9 оноо, Т.Санчир 5 оноо, 11 самбараар багтаа тус хүргэлээ.
Харин Альянс Тех Харцага баг энэ улирлын анхны легионер тамирчнаа эгнээндээ нэгтгэжээ. Төвийн байрлалд тоглодог Brandon Goode нь одоо 25 настай, NBA-н хөгжлийн лигийн Delaware 87ers багт драфлагдаж, мөн Казахстан болон Эстони улсуудын лигт тоглож байжээ. Тэрээр эхний тоглолтондоо 15 оноо, 12 самбар авсан. Харин Харцагуудаас Г.Цэнгүүнбаяр 22 оноо, 6 самбар авч, багаа ээлжит удаагаа тэргүүлсэн бол, П.Болортулга 11 оноо, 10 самбар, Б.Наранбаатар 10 оноо, Э.Дөлгөөн 7 оноо, 7 самбар авчээ. Улмаар тоглолтын төгсгөлд 92-84 харьцаатай SBL Хасын Хүлэгүүд баг хожиж, улирлын 8 дахь хожлоо авлаа.
Эх сурвалж : МҮСБХ