Өнөөдөр Азийн жудо бөхийн холбооны удирдах зөвлөлийн гишүүд Хонгконг улсад хуралдлаа. Энэ хурлаар манай улсад хамааралтай нэгэн зүйл баталсан нь 2020 он буюу олимпийн жилийн жүдо бөхийн Азийн аварга шалгаруулах тэмцээнийг Улаанбаатар хотод зохион байгуулахаар шийдвэрлэсэн байна. Энэхүү эрхийн төлөө Монгол Улс Казахстан, Туркменстан улсуудтай өрсөлдсөн бөгөөд хуралд Азийн жудо бөхийн холбооны сахилгын хороон дарга Б.Пагва, Монголын жүдо бөхийн холбооны гүйцэтгэх захирал М.Бөхбат нар оролцсон юм.
Энэ оны тивийн аварга шалгаруулах тэмцээн тавдугаар сарын 26-28-ны өдрүүдэд Хонгконгт болох бол ирэх онд Азийн наадам Индонезийн Жакартад, 2019 оны Азийн аварга Саудын Арабт зохион байгуулагдах билээ.