Үндэсний сагсан бөмбөгийн холбооны Өрнөд бүсийн аваргаар Голден Стэт Уарриорс шалгарсан бол Дорнод бүсийн аваргын төлөөх цуврал тоглолт энэ өдрүүдэд үргэлжилж байна. Дорнод бүсийн аваргын төлөө шалгарч үлдсэн өнгөрсөн улирлын аварга “Клевлэнд Кавалерс” болон энэ улирлыг амжилтаараа тэргүүлсэн “Бостон Селтикс” багууд тоглож байгаа билээ.
Цувралын дөрөвдэх тоглолт өнөө өглөө Кавалерсын талбайд явагдлаа. Тоглолтын эхний хагасыг зочин Бостон сайн хийж 57-47 харьцаагаар тэргүүлсэн. Энэ хагасд Кавалерсын Леброн Жеймс дөрвөн алдаатай болсон нь тэднийг хүнд байдалд оруулсан. Гуравдугаар үед эздээс Кайри Өрвинг гайхалтай тоглож дараалсан 9 оноо авч багтаа тэргүүлэл авчирсан юм. Шийдвэрлэх үеийн тоглолт өрсөлдөөнтэй өрнөж байсан ч Леброн Жемс, Кевин Лав нар онцгой байж үндсэн цагт 99-112 харьцаагаар эзэд хожил авсан.
Тус тоглолтод Кайри Өрвинг 42 оноог авч багаа тэргүүлсэн бол Кевин Лав 17 оноо, 17 самбар, Леброн Жемс 34 оноо, 5 самбар, 6 дамжуулалтаар багаа тэргүүлжээ. Харин эсрэг багаас Эвери Бредли 19, Жоё Кравдер 18, Ал Хорвард 16, Келли Олиник 15 оноог авчээ. Ийнхүү аваргаа хамгаалагчид цувралыг 3:1-ээр тэргүүлж эхэллээ. Дараагийн тоглолт 26-ны өглөө Бостон Селтиксын талбайд явагдана.
(1).JPG)
