Монголын сагсан бөмбөгийн холбооноос зохиож буй “NISSAN” дээд лигийн аваргын төлөөх цувралын 6 дахь тоглолт “Спортын төв ордон”-д явагдлаа. Өмнөх тоглолтонд хангалтгүй байсан Хүлэгүүдийн лидер ОУХМ Т.Санчир өнөөдрийн тоглолтонд эхнээсээ сайн тоглолтоо үзүүлж байлаа.
Түүний хувьд нэгдүгээр үед 11 оноо авч улмаар баг нь 28-18 буюу 10 онооны давуутай тоглолтыг эхлүүлсэн юм. Харин Ирвэсүүдээс энэ цувралын гол баатруудын нэг болоод буй Г.Билгүүн 7 оноотой эхний үеийг өндөрлүүлсэн. Эхний хагасын Хүлэгүүд 57:43–ийн харьцаатайгаар тэргүүлсэн юм.
Харин тоглолтын гуравдугаар үед “Этүгэн Ирвэсүүд” баг 14 онооны зөрүүг 7 онооны зөрүүтэй тоглолт болгон ойртуулсан. Гэсэн ч Хүлэгүүдийн захиалсан завсарлга үр дүнгээ өгч дараалсан 8 оноог авч онооны зөрүүг 15 болгон холдууллаа. Гуравдугаар үе 80-62 буюу Хүлэгүүдийн 18 онооны давуутай өндөрлөсөн бөгөөд энэ үед тэд багаараа хамгаалалт довтолгоонд үнэхээр жигд байлаа. Улмаар шийдвэрлэх үед ч давамгайллаа хадгалж үндсэн цагт 100:79 -өөр ялалт байгуулж тоглолтын шилдгээр ОУХМ Т.Санчир шалгарсан.
Харин хожигдол хүлээсэн Ирвэсүүдээс Эйжи Уэст болон , Г.Билгүүн нар сайн тоглолтоо үзүүлсэн хэдий ч багийн лидер ОУХМ Д.Мөнхтүвшин болон Н.Барнес нар өөрсдийн сайн тоглолтоо үзүүлж чадаагүй юм. Цувралын 6 дахь тоглолт ирэх Лхагва гарагт СТО-нд үргэлжлэн явагдах бөгөөд Ирвэсүүд хожигдох эрхгүй талбайд гарна.
(1).JPG)
