Английн “Арсенал” клуб энэ зуны анхны наймаагаа албан ёсоор зарлалаа. Дасгалжуулагч Арсен Уэнгэртэй гэрээгээ сунгасан тэд энэ удаа Германы “Шальке 04” клубээс зүүн жигүүрийн хамгаалагч Саед Коласинакыг элсүүлсэн байна. Босни хамгаалагчийн гэрээ энэ жил дууссан тул “Их буучид”-тай үнэгүй нэгдэж таван жилийн гэрээг үзэглэжээ. Тэрээр “Шальке 04”-ын үндсэн багт 94 тоглолт хийж 4 гоол оруулсан юм. Өнгөрсөн улиралд “Бундес лиг”-д 5 гоолын дамжуулалт өгсөн бөгөөд энэ нь лигийн хамгаалагчдыг тэргүүлэх үзүүлэлт болсон. Коласинак нь Германд төрсөн хэдий ч Босни улсын шигшээ багт тоглодог юм. “Арсенал” клуб долоодугаар сарын 1-нд солилцоо наймааны нээгдэхэд шинэ тологчоо албан ёсоор танилцуулна.
О.ДАШНЯМ
