У.Хүрэлсүх намын дарга, ерөнхий сайд хэвээрээ үлдэхийг чин сэтгэлээсээ хүсэж байна. Тэр кабинетээ авч үлдэх нэрээр өөрийгээ ч энэ өндөр тушаалд тогтоохыг эрмэлзэж байна. Засгаа тогтоон авч үлдэх түүний улс төрчийн хувиар хийх яриа хэлэлцээр бүтэлгүйтэж эхэлсэн тул цэргийн бага даргын хувиар эрс шийдэмгий арга хэмжээ авах нь зөв гэж үзсэн байна. Энэ бол өрсөлдөгчөө "намнах төлөвлөгөө" буюу өрсөж цохих тактик. Түүнд хамгийн их аюул учруулж магадгүй этгээд бол түүний удирдах МАН, тэдний 64 гишүүнээс бүрдэх УИХ, УИХ-ыг удирдах Их хурлын дарга М.Энхболд, УИХ дахь МАН-ын 32-ын бүлэг, түүнийг удирдах бүлгийн дарга Хаянхярваа болжээ. Мөн М.Энхболд, Хаянхярваа гишүүнтэй " мөргөлдөх"тулааны хомрогонд нь хотын дарга Су.Батболд өртөж буй. Тиймээс түүнийг МАН-ын хотын намын даргын сонгуульд дэмжилгүй унагаж, дээр нь Нийслэлийн захирагч бөгөөд хотын даргын үүрэгт ажлаас нь чөлөөлсөн. Энэ бол намын удирдах зөвлөлд хүргэлгүйгээр ерөнхий сайдын мэдлийн хүрээний дангаараа гаргах шийдвэр, уул нь. У.Хүрэлсүх МАН-ын Удирдах зөвлөлөө гартаа атгаж буй учир намын улс төрийн шийдвэрийг хүссэнээрээ гаргаж чадаж буйг өнгөрсөн шөнийн МАН-ын Удирдах Зөвлөлийн шийдвэр илтгэнэ. УЗ-ийн 29 гишүүний 17 - г нь багцалсан учир Хотын дарга Су.Батболдыг чөлөөлөх, УИХ дахь намын бүлгийн дарга Хаянхярвааг өөрчлөх шийдвэрийг гаргуулж дөнгөсөн. Харин УИХ-ын дарга М.Энхболдыг УИХ-ын даргаас чөлөөлөх асуудлыг өнөөдөр УИХ-ын МАН-ын бүлэгт оруулна. Асуудлыг өөрийнхөөрөө шийдүүлж чадвал, тэрбээр суудалдаа үлдэнэ. Эс чадваас өөрийнхээ суудал дор тэсрэх бөмбөг тавьсан гэж үзэж болно. МАН -д У.Хүрэлсүх хүчтэй юу, М.Энхболд хүчтэй юу? гэдгийг хэдхэн цагийн дараа мэдэж болох нь.
Намын даргын суудал үнэтэй, Монголд. Ялангуяа эрх баригч намын дарга болноо гэдэг бол Монгол улсын хаан боллоо л гэсэн үг. Тэгэхээр энэ тамга бол Хүрэлсүхэд хааны суудал " залсан". Энэ удаа Хүрэлсэх ялсан. Харин дараачийн маш том тулаан нүүрлэжээ. Энэ бол МАН-ын өмнөх, одоогийн даргын " үхлийн" тулаан байх болно. Энэ тулаанд ялахын тулд М.Энхболд УИХ-ын даргын өндөр сэнтийгээ бусдад найр тавихад ч бэлэн байна. М.Энхболдын хувьд У.Хүрэлсүхийг л " унагах", юу ч үгүй болгох. Харин У.Хүрэлсүхийн хувьд М.Энхболдыг " буулгаж авах", үгүй бол эрүүгийн гэмт хэрэгт татах. Ийм л тулааны өмнө тэд зогсож байна. Хуурамч инээмсэглэл, хуурамч гар атгалт холдон олдсон.
Ц.ЭНХБАТ
