ШӨХТГ-ын дарга асан Т.Аюурсайхан “О.Магнай ШӨХТГ-ын дарга хийж байхдаа томоохон компаниудтай шүүхийн тавцан дээр эвлэрдэг байжээ” хэмээн мэдэгдсэн. Тодруулбал, нэр бүхий сүлжээ дэлгүүр, шатахуун түгээх станц, арилжааны банкуудад торгууль тавьдаг боловч дараа нь их хэмжээний мөнгө авч, торгуулиа хүчингүй болгодог гэсэн мэдээллийг тараасан юм.
Тэгвэл өнөөдөр О.Магнай “НИК” ХК-д тавьсан дөрвөн тэрбум төгрөгийн торгуулийг цуцалсан асуудлаар мэдээлэл хийлээ. Тэрээр Т.Аюурсайханыг улс төрийн зорилготойгоор иймэрхүү яриа гаргаж байна гэсэн юм.
О.Магнай "Намайг ажиллаж байх үед шатахууны хомстол үүсгэсэн гэх нэрийдлээр иргэдийг залилж, зохиомол хомстол үүсгэдэг байсан "НИК" компанийг ШӨХТГ-аас торгосон. Гэвч Т.Аюурсайханы үед ШӨХТГ гурван шатны шүүхэд "НИК" компанид ялагдал хүлээсэн. Үнэндээ Т.Аюурсайхан "НИК" компанитай үгсэн хуйвалдаж, торгууль тавьсан н.Очирсүх гэдэг байцаагчийг удаа дараа дарамталж, ажлаас ор үндэслэлгүй халсан байдаг. Зөвхөн энэ байцаагчийг ч халаад зогсоогүй ШӨХТГ-ын нийт ажилтны 90 хувийг халж, сольсон. Учир нь НИК" компани нь Монгол Улсын Ерөнхийлөгч асан Н.Багабандийн хувь эзэмшдэг, түүний сайн найз Ш.Отгонбилэг агсны гэр бүлийн бизнес юм. Харин Аюурсайхан бол урьд нь Н.Багабанди ерөнхийлөгчийн туслахаар ажилладаг байсан гэдгийг та бүхэн мэдэх байх. Тэгэхээр эд бол Н.Багабандиар толгойлуулсан нэг түрийвчтэй олигарх бүлэглэл” хэмээн мэдэгдлээ. Түүнчлэн худал гүжирдлэгээр олон нийтийн тархийг угааж, нэр төрд халдсан гэх үндэслэлээр Т.Аюурсайханыг шүүхэд өгөх болсноо дуулгасан юм.
А.САЯН