Би ганц бие. Амьдралаа залгуулж яваа л эр хүн. Бусдаас гуйлга гуйж сураагүй. Өөртөө морин тэрэгтэй. Захиалга ирвэл тав, гурван төгрөгөөр тээвэрлэлт хийдэг. Тээврийн захиалга орж ирэхгүй бол шил, сав түүж тушаадаг ажилтай. Өдөртөө тав гурван төгрөг олж, түүгээрээ өөрийгээ болгож л , амьдралаа торгоож л явна. Хүмүүс намайг ядарсан л гэдэг. Үнэн. Би ядарсан хүн. Гэхдээ задарсан хүн биш. Гачуурт тосгон даяар намайг мэднэ. Энэ тосгонд морин тэрэгтэй ганцхан л хүн байдаг нь би. Намайг Энхээ гээд сураарай. Хэлээд өгнө. Морь маань надад амьдралын түшиг тулгуур болдог учир би хул мориндоо хайртай. Энэ мориныхоо л хүчинд амьдралыг залгуулж байна. Тиймээс морио би хайрладаг, бас арчилдаг. Өдөртөө Туул голын хөвөөнд очиж, морио идүүлж, ундаалж хүч тамирыг нь авахуулдаг. Тэргэнд хөллөсөн болохоос хурдан морь. Морио уралдуулна. Түрүүлнэ ч гэж бодож буй. Дараа уулзахдаа медалийг нь үзүүлнэ ээ. Би морьтойгоо Тосгоныхоо гудамж нэг бүрээр хэсүүчилсэн. Нэг зүйлд сэтгэл гутарч байна. Гачуурт тосгоны маань өнгө дэндүү гундуу байна. Нэлдээ хог, хаяглалдаа баригдсан байна. Гудмаар дүүрэн л хог. Үүнийг засаж залруулах юмсан гэж бодох юм. Хүн байна, хогон дунд бүү амьдар . Ингэж Гачуурт тосгоны морин тэрэгт Энхээ Control.mn-д дуулгалаа.
С.ШИНЭСАР