Ардчиллын удирдагч С.Зориг агсны эхнэр Б.Булганыг 2015 оны 11 дүгээр сарын 14-ний өдөр саатуулан баривчилж, сэжигтнээр татан цагдан хорьсон байдаг. Түүнээс хойш Б.Булганыг чухам ямар хэргийн улмаас баривчилсан тухай хуулийнхан одоо болтол албан ёсны тайлбар мэдээлэл өгөөгүй байгаа юм.
Тэгвэл саяхан УИХ-ын гишүүн Ц.Оюунгэрэл, Л.Болд нар тус хорих ангид очоод иржээ. Энэ талаараа Ц.Оюунгэрэл гишүүн “Өдрийн сонин”-д ярилцлага өгсөн байна. Тэрээр “Б.Булганы өрөө байнгын тогтмол тод гэрэлтэй. Бусдаас олон бас илүү хурц гэрэлтэй учраас тэнд жоомоо ч нуухын аргагүй. Тэр хүний амьдрал тийм л байнгын хяналт дор байна. Манаач харуул, тагнуулын ажилтнууд, хоригдож байгаа хүмүүс бүгд эрэгтэй. Тийм хүнд нөхцөлд ганц эмэгтэй хүн байна. Бие засах газар нь хүртэл үүдэндээ. Өөрөөр хэлбэл, Б.Булган бие засч, ариун цэвэр сахисан ч эрчүүдийн нүдэн дээр. Тийм байдлаар хүний эрхэмсэг байдлыг алдагдуулж, залхаан цээрлүүлж байгаа тал ажиглагдсан. Талийгаач нөхрийнхөө тайван замаар авчирч өгсөн эрх чөлөөний өчүүхэн хэсгийг ч Б.Булган эдэлж чадахгүй байна. Уулзалтын үеэр Б.Булган “Би бол хохирогч хүн. Би гэрч. Би энэ хэргийг хийгээгүй, захиалаагүй, зохион байгуулаагүй. Үнэн мөн нь олдоно гэдэг итгэл бөхөөгүй байгаагаа хэлж байна лээ.” хэмээн ярьжээ.
Энэхүү уулзалтын дараа тэрээр төрийн гурван өндөрлөгт хоёр зүйлийн талаар албан захидал хүргүүлсэн байна. Уг захидалдаа Шүүхийн шийдвэр биелүүлэх газар өөрөө Тагнуулын ерөнхий газрын дарамт дор ажилладаг талаар болон Б.Булганы эрх зөрчигдөж байгаа талаар дурджээ.
А. САЯН
