Путин ямар ч асуултад гацдаггүй. Тэр 14 дэх удаагаа иргэдтэй телевизийн шууд ярилцлага хийлээ. Энэ удаа Путинтэй холбогдох гэж 1,000,000 дуудлага орж ирсэн тухай хэвлэлийн алба мэдээллээ. Путин иргэдтэйгээ шууд эфирт уулзахын тулд өөрийгөө сайн бэлддэг гэж Оросын ерөнхийлөгчийн хэвлэлийн төлөөлөгч Дмитрий Песков хэлж байна. Тухайн цаг үед улс орны хэмжээнд юу болоод байгааг ерөнхийлөгч судалж мэддэг. Асуудал хаана байгааг мэдэрдэг. Ямар ч асуултаас тэр зугтдаггүй. Мянга мянган асуултыг өөрийн биеэр судалж, холбогдох яам, агентлагийн дарга нартай холбогдож, тухайн салбарын нөхцөл байдлыг нягталдаг. Энэ хэлбэрээр Путин өөрийгөө бүрэн Update буюу өөрийнхөө мэдлэгийг шинэ шатанд гаргаж чаддаг гэж түүний хэвлэлийн төлөөлөгч тодотголоо. Үнэхээр Путин нэг ч асуултад тороогүй. "Украйны ерөнхийлөгч Порошенко, Туркийн ерөнхийлөгч Эрдагон нар живж байвал",
- Та хэнийг нь түрүүлж аврах вэ? гэх балчир охины асуултад
- Тэд өөрсдөө живж байхад би юу ч хийж чадахгүй. Харин тусламж гуйвал гараа сунгахад бэлэн" гэж хариуллаа.
Украйн, Турк хэзээ нэгэн цагт Оросыг гуйх л болно гэж тэр ойлгогдохоор хэллээ.
"-Бидэнд хэн нэгэн дайсагнаж буйг харсаар зүгээр сууж болохгүй. Бид хариуг нь барих ёстой. Үгүй бол тэд бидний хүзүүн дээр мордчихно" гэж хариулсан.
Энэ хариултыг АНУ болон Европын холбоонд хандаж хэллээ гэж бас ойлгож болно. Тэртэй тэргүй түүнийг үгийг задлан шинжлэх нь тодорхой. Харин Оросын ерөнхийлөгч хариултыг маш товч, тэгээд тодорхой өгч байлаа. Хувийн гэр бүлийн асуултыг ч тэр тойроогүй. Уулзаж байгаа, байнга биш. Гэхдээ харьцаа сайн, аль аль нь сэтгэл хангалуун үлдсэн гэдгээ ч хэлсэн. Удахгүй тэргүүн хатагтайтай болж болохоо ч үгүйсгээгүй. Тэр өөрийгөө Оросын тэргүүн, дэлхийн хэмжээний лидер, Оросын ард түмний итгэл найдвар гэдгээ дахин харуулсан уулзалт ийнхүү өндөрлөлөө. Ард түмнийхээ итгэлийг даана гэдэг ийм байдаг бололтой.
Нийтлэлч Ц.ЭНХБАТ