Уржигдар дурангийн тасаг хаагдсан. Зүрхний цахилгаан бичлэгийн цаасгүй гэж өчигдөр дурангийн тасгийг хаасан. Маргааш лаборатороо хаана. Эцэст нь эмнэлгийг бүхэлд хаахаар зэхэж байна. Аль эмнэлэг вэ? гэж асуух байх. Монгол-Япон сургалтын эмнэлгийн тухай хэлж байна. Япончуудын (тусламжаар )бэлгээр барьсан, Монголын ард түмний удтал хүлээсэн Монгол улс дахь цорын ганц University hospital-ыг хаах гэж байна. Шалтгаан нь тѳсѳв, санхүүжилт зогссон. Ѳѳрѳѳр хэлбэл Монгол Улсын Засгийн газар гэрээгээ хүлээсэн үүргээ биелүүлэхээс цааргалж байгаатай холбоотой. Эмнэлэг баригдаж дуусах чимээнээр нь ѳмнѳх даргыг халж, намын томилгоог хийж, ѳѳрийн хүнээ байршуулж дѳнгѳсѳн. Намын томилолтоор ирсэн шинэхэн дарга нь тэнгэрээс бууж ирдэггүй, эмч нар, эмнэлгийн амьдралаас тасарсан нэгэн. Эмнэлэг нь хаагдаж байхад эмч нартайгаа ч уулздаггүй, тѳсѳв мѳнгѳний асуудлыг ч хѳѳцѳлддѳггүй. Санаатайгаар ч ийм байдал үүсгэж байхыг үгүйсгэхгүй. Нѳхцѳл байдал ѳдрѳѳс ѳдѳрт дордож, эмнэлэг үүд хаалгаа барихдаа тулсан учир АШУҮИС-ийн дийлэнхи багш, ажилчид, эмнэлгийн хамт олон санаа нэгдэж, гарын үсгээ зурж, Ерөнхий сайд, УИХ-ын дарга, ЗГХЭГ-ын дарга, БСШУЯ-нд албан тоот илгээлээ.
Ямар хариу ѳгѳх, ямар шийдвэр гаргахыг бултаараа харуулдан хүлээж байна. Мѳг Японд төгсөгчдийн холбоонд хандаж, тус холбоогоор дамжуулж Японы элчин сайдын яаманд үүсээд буй асуудлыг уламжиллаа. Засгийн Газар ѳнѳѳг хүртэл ганцхан ажлыг сайн хийсэн. Тэр нь бүхий л телевизийн сувгаар Япон стандартын эмнэлэг барьсан, ард түмэндээ хүлээлгэн өгсөн гэсэн ѳѳрийгээ магтсан сурталчилгаа л байлаа. Засгийн газар хүлээсэн үүргээ орхигдуулж, тѳсвийг тасалдуулснаар жирийн ард иргэдэд зориулсан цорын ганц ѳндѳр түвшиний эмнэлгийн үйл ажиллагааг зогсоох гэж байна. Үүний хор хохирлыг тооцох аргагүй. Эмнэлэг байгуулах, тоног тѳхѳѳрѳмжѳѳ суурилуулах, нээх, мэргэжилтнүүдээ сургаж бэлдэхэд зарцуулсан олон жилийн нѳр их хѳдѳлмѳрийг булшлахад хүргэнэ. Бэлдэж сургасан эмч, сувилагч, нарийн мэргэжилтээ алдах нь. Боловсон хүчин бол мѳнгѳтэй болсон ч, нэг ѳдѳр шийддэг тѳхѳѳрѳмжтэй адил биш. University Hospital нь Их Сургуулийн эмнэлгийн тогтолцоогоор дамжуулан Монгол улсын эрүүл мэндийн салбарын үйлчилгээг сайжруулах Монгол-Японы хамтарсан АЛСЫН том зорилгыг агуулж буй. Энэ зорилго ч нурах аюулд хүрлээ. Тиймээс үүсээд буй асуудал зөвхөн АШУҮИС-ийн эмнэлгийн тухай биш юм. Их сургуулийн эмнэлгийн тогтолцоо нь сурган төгсгөж байгаа мэргэжилтнүүдээрээ дамжуулан Монгол Улсын иргэн бүрт хамаарах эрүүл мэндийн үйлчилгээнд оролцож, хийж буй олон тооны судалгаагаараа дамжуулан шинэ инновац, шинэ эмчилгээнүүдийг гаргаж, өөрсдийн үзүүлж буй ЭМ-ийн үйлчилгээгээрээ бусаддаа үлгэр дууриал үзүүлэх гэх мэтээр МУ-ын эрүүл мэндийн салбарын хөгжлийн амин тулгуур юм гэдгийг онцольё. Эмч нар бид айж түгшиж байна, яг одоо. ИХ сургуулийн эмнэлэг байгуулж байна гээд хандив төсөвөөр байгуулсан Сонгдо эмнэлгийг ард түмнээс булаан авсан бэлэн жишээг мэднэ. Бид дуугүй байсан. Сонгдо эмнэлгийн бодит жишээ байгаа учир бид айж байна. Энэ айдас, хилэн болж ч мэдэх юм.
ЭМЧ,СУВИЛАГЧ, ЭМНЭЛГИЙН АЖИЛТНУУД