Үндэсний агаарын тээвэрлэгч МИАТ ХК БНСУ-ын нийслэл Сөүл хот руу өдөр бүр нислэг үйлдэхээр болжээ. Нислэгээ энэ сарын хоёр дахь долоо хоног буюу 9-ний өдрөөс эхлэх юм байна. Дашрамд дурдахад, МИАТ ХК-иар зорчигчиддоо хялбар, түргэн шуурхай, цогц үйлчлэх зорилгоор Сөүл хотын Кангнам дүүрэгт байрладаг City Airport агенттай хамтран ажиллаж байгаа аж. Ингэснээр зорчигчид City Airport агентийн 1 дүгээр давхарт байрлах Бүртгэлийн цэгт бүртгүүлэн, тээшээ өгч, суугчийн талоноо аваад, 2 дугаар давхарт байрлах Хилийн шалган нэвтрүүлэх цэгт гадаад паспортоо шалгуулан хил нэвтрэх тамга даруулаад тусгай автобусаар шууд Инчён Олон улсын нисэх буудалд хүрэх гэнэ.
А.САЯН