Хилийн чанадаас эх орондоо ирэх хүсэлтээ 10,583 иргэн илэрхийлээд байгаа бөгөөөд ирэх зургаадугаар сард тусгай үүргийн найман нислэг үйлдэж 2,000 орчим иргэнээ эх орондоо авчирна
Ирэх зургаадугаар сард агаарын замаар иргэдээ авчрах хуваарийг календарчлан Улсын онцгой комиссын даргаар батлуулаад байна. Зургаадугаар сард нийт 2,000 мянга орчим иргэнийг татан авчирна. Эхний нислэгээр 1,097 иргэний гаргасан хүсэлтийг үндэслэн Казахстан улс руу тусгай үүргийн нислэг хийхээр төлөвлөж байна. Энэ нислэгийг хоёр сар орчмын өмнөөс бэлдсэн. Энэ татан авах ажиллагааг хоёр улсад ашигтай буюу Монгол Улсад байгаа Казахстан улсын иргэдийг аваачиж, тэндээс иргэдээ авчирах байдлаар зохион байгуулна.
Дараа нь зургаадугаар сарын 11-нд Токио руу нислэг үйлдэхээр төлөвлөөд байна.
Энэтхэг улсад байгаа ламхай нарыг авчрах ажлыг зохион байгуулна. БНЭУ-ын баруун урд байдаг Го гэдэг мужид байгаа ламхай нарын аюулгүй байдлыг хангах үүднээс зургаадугаар сарын дундуур энэ нислэгийг үйлдэнэ.
Үүний маргааш нь буюу зургаадугаар сарын 18-нд Солонгос улс руу дахин нислэг үйлдэнэ. Түүний дараа Франкфурт руу нислэг үйлдэхээр төлөвлөж байна.
