Ази тивийн аварга, холын зайн гүйлтийн тамирчин, Монгол улсын гавьяат Бат-Очирын Сэр-Од 5 дахь олимпдоо дараалан оролцох эрхээ авчээ. Өдгөө 40 настай Б.Сэр-Од Япон Улсад зохиогдсон Lake Biwa Mainichi 76 дахь удаагийн марафон гүйлтэд оролцож, 2 цаг 9 минут 26 секундын амжилтаар барианд орсон байна. Тус тэмцээнд нийт 400 гүйгч уралдсанаас Б.Сэр -Од 33 дугаар байр эзэлжээ. Сэр-Одын хувийн дээд амжилт нь 2цаг 8минут 50 секунд байдаг бол дэлхийн рекорд 2цаг 1минут 39 секунд аж. Энэхүү дээд амжилтыг олимп, дэлхийн аварга Элиуд Кипчоге тогтоосон байдаг. Журмын дагуу 2 цаг 11 минут 30 секундээс дотогш гүйж байж Олимпод оролцох эрхийг мэргэжлийн марафончдад олгодог журамтай юм байна. Тэгвэл Монголын гүйгч , гавьяат тамирчин Б.Сэр-Од 2 цаг 9 минут 26 секунд хурдалж, эрхийн нормыг хангасан байна. Олимпийн бэлтгэлээ Японд хангаж буй Сэр-Од Токиогийн олимпод эхний 20- д хурдлах зорилготойгоор бэлтгэлээ үргэлжлүүлж байна. Монгол улсаас ОУХМ Цэвээнравдангийн Бямбажав, Баярцогтын Мөнхзаяа нар марафон гүйлтийн төрлөөр олимпийн эрхээ өмнө нь авчээ.
Э.ОТГОО