Казино бол уул уурхайн бизнесээс илүү үр ашигтай гэдэг нь нэгэнт нотлогдсон. Аялал жуулчлал хөгжүүлье л гэж зорьж буй бол Казиног нэн даруй байгуулах шаардлагатай. Гэмт хэрэг дэгдэнэ, янхан, биеэ үнэлэх явдал газар авна гэдэг бол хоосон болгоомжлол. Хувь хүн биш, төр өөрөө энэ бизнесийг гартаа авч, удирдах нь оновчтой. Алсдаа "Эрдэнэс таван толгой"-гоос ч илүү ашиг өгнө.
Учир нь уурхайн баялаг дундарч, хоосордог бол Казино улам хөгждөг. Ямар ч гэсэн Монгол улсын эдийн засаг хүндэрсэн тул нэн яаралтай мөнгө олох салбарыг дэмжих арга саамыг УИХ, Засгийн газар эрэлхийлэх болсон. Ховор ан амьтнаа агнуулах журмыг өөрчилж, тоо толгойг нь нэмэгдүүлэх, кокайны төрлийн ургамлыг тарьж ургуулж, гадагшаа худалдаалах, Казино байгуулах зэрэг төслийг Засгийн газраас УИХ-д өргөн барьчихлаа. Үүнээс эдийн засгийн хамгийн өндөр ач холбогдолтой нь Казино.
-Казино бол маш том эдийн засгийн том эргэлттэй бүтэц. Түүнийг зөв зохион байгуулах ёстой. Мөнгө угаалттай нь холбогдож болохгүй. Тэгвэл олон улсын хэмжээнд эдийн засгийн хориг тавиулах аюултай. Энэ аюулаас сэргийлж чадвал Казиног байгуулахад асуудалгүй. Хориглох ч шаардлагагүй гэж сангийн сайд Жавхлан байр сууриа илэрхийлсэн.
