САРМАГЧНЫ ЦЭЦЭГ ӨВЧНИЙ ТОХИОЛДЛЫН ТОО 1000 ДАВЖЭЭ

2022-06-09  

Сармагчны цэцэг өвчин голчлон бүртгэгддэг Африкийн орнуудаас гадна илэрсэн уг өвчний тохиолдлын тоо 1000 давсан талаар Дэлхийн эрүүл мэндийн байгууллага лхагва гарагт мэдээллээ.

ДЭМБ-ын тэргүүн Тедрос Адханом Гебрейесусын мэдээлснээр, тэдгээр эндемик бус оронд сармагчны цэцэг өвчний эрсдэл бодитой болж байгаа ч одоогийн байдлаар урьдчилан сэргийлэх боломжтой байна. 

Сармагчны цэцэг өвчний тохиолдол тавдугаар сарын эхэн үеэс бүртгэгдэж эхэлснээсээ 29 оронд илрээд байгаа бөгөөд нас барсан тохиолдол бүртгэгдээгүй байна.

Швейцарын Женев хотноо болсон хэвлэлийн бага хурлын үеэр Т.Гебрейесус, энэ он гарсаар Африкт сармагчны цэцэг өвчний сэжигтэй 1400 гаруй тохиолдол илэрч, 66 өвчтөн нас барсан талаар мэдээлжээ. Үүнээс гадна зарим оронд олон нийтийн дунд тархаж буй шинж ажиглагдаж байгааг дурдсан байна. ДЭМБ сармагчны цэцгээр халдварласан хүмүүст гэртээ тусгаарлагдахыг зөвлөж байгаа юм.

ДЭМБ-ын Сармагчны цэцэг өвчний асуудал хариуцсан дарга Розамунд Льюисын хувьд, халдвар дамжих гол зам нь “халдвартай хүний биед хүрэх” гэдгийг онцлоод, вирус агаар дуслын замаар дамжих эрсдэл бий эсэхийг хараахан тогтоогоогүй байна гэв. Тэрбээр халдвар авсан өвчтөнүүдтэй ажиллаж буй эмнэлгийн ажилтнууд амны хаалт зүүх хэрэгтэй гэдгийг нэмж хэлжээ.

Мөн одоогоор илэрсэн халдварын тохиолдлуудын дийлэнх нь ижил хүйстэнтэйгээ бэлгийн харьцаанд ордог эрэгтэйчүүдийн дунд бүртгэгдэж байгааг ДЭМБ мэдээлсэн ч эмэгтэйчүүд халдвар авсан тохиолдлууд мөн байгааг дурдсан байна. Тус байгууллага олон нийтийн мэдлэгийг дээшлүүлэх, тархалтыг зогсоохын тулд НҮБ-ын ХДХВ-тэй тэмцэх хөтөлбөр болон холбогдох бүлгүүдтэй хамтран ажиллаж байгаа ажээ.

ДЭМБ-ын мэдээлснээр, зарим оронд эмнэлгийн ажилтнууд болон халдвартай хүмүүсийн ойрын хавьтлуудыг вакцинжуулах асуудлыг авч үзэж магадгүй байна. Вакцинжуулалтад дэлхий нийт 1980 онд бүрэн ангижирсан салхин цэцгийн вакциныг хэрэглэх бөгөөд энэ вакцин нь сармагчны цэцгээс хамгаалж байгааг олон судалгаагаар тогтоожээ.

Сармагчны цэцэг өвчин илэрсэн орнууд

Америк тив

  • Аргентин /зургаадугаар сарын 2-ны байдлаар хоёр тохиолдол/,
  • Канад /зургаадугаар сарын 7-ны байдлаар 81 тохиолдол/,
  • Мексик /тавдугаар сарын 28-нд анхны тохиолдол илэрсэн/,
  • АНУ /зургаадугаар сарын 8-ны байдлаар 12 муж улсад 35 тохиолдол/

 

Европ

  • Австри /тавдугаар сарын 22-нд анхны тохиолдол илэрсэн/,
  • Бельги /тавдугаар сарын 20-нд анхны хоёр тохиолдол илэрсэн, зургаадугаар сарын 5-ны байдлаар 17 тохиолдол/,
  • Чех /тавдугаар сарын 24-нд анхны хоёр тохиолдол илэрсэн, зургаадугаар сарын 2-ны байдлаар 6 тохиолдол/,
  • Дани /тавдугаар сарын 23-нд анхны тохиолдол илэрсэн, зургаадугаар сарын 3-ны байдлаар гурван тохиолдол/,
  • Финланд /тавдугаар сарын 27-нд анхны тохиолдол илэрсэн, зургаадугаар сарын 2-ны байдлаар хоёр тохиолдол/,
  • Франц /зургаадугаар сарын 7-ны байдлаар 66 тохиолдол/,
  • Герман /тавдугаар сарын 20-нд анхны тохиолдол илэрсэн, зургаадугаар сарын 7-ны байдлаар 80 тохиолдол/,
  • Гибралтар /зургаадугаар сарын 1-нд анхны тохиолдол илэрсэн/,
  • Унгар /тавдугаар сарын 31-нд анхны тохиолдол илэрсэн/,
  • Ирланд /тавдугаар сарын 28-нд анхны тохиолдол илэрсэн, зургаадугаар сарын 7-ны байдлаар долоон тохиолдол/,
  • Итали /тавдугаар сарын 19-нд анхны тохиолдол илэрсэн, зургаадугаар сарын 1-ний байдлаар 20 тохиолдол/,
  • Латви /зургаадугаар сарын 3-нд анхны тохиолдол илэрсэн/,
  • Мальта /зургаадугаар сарын 2-нд анхны тохиолдол илэрсэн/,
  • Нидерланд /тавдугаар сарын 20-нд анхны тохиолдол илэрсэн, зургаадугаар сарын 7-ны байдлаар 54 тохиолдол/,
  • Норвег /тавдугаар сарын 31-нд анхны тохиолдол илэрсэн/,
  • Португал /зургаадугаар сарын 8-ны байдлаар 191 тохиолдол/,
  • Словени /тавдугаар сарын 24-нд анхны тохиолдол илэрснээс хойш нийт зургаан тохиолдол/,
  • Испани /зургаадугаар сарын 7-ны байдлаар 225 тохиолдол/,
  • Швед /тавдугаар сарын 19-нд анхны тохиолдол илэрсэн, зургаадугаар сарын 2-ны байдлаар таван тохиолдол/,
  • Швейцар /тавдугаар сарын 21-нд анхны тохиолдол илэрсэн, зургаадугаар сарын 7-ны байдлаар 10 тохиолдол/,
  • Их Британи /зургаадугаар сарын 7-ны байдлаар 321 тохиолдол/

Ойрхи Дорнод, Африк

  • Израил /тавдугаар сарын 21-нд анхны тохиолдол илэрсэн, зургаадугаар сарын 2-ны байдлаар хоёр тохиолдол/,
  • Марокко /зургаадугаар сарын 2-нд анхны тохиолдол илэрсэн/,
  • АНЭУ /тавдугаар сарын 24-нд анхны тохиолдол илэрснээс хойш 13 тохиолдол/

Ази-Номхон далай

  • Австрали /тавдугаар сарын 20-нд анхны тохиолдол илэрсэн, зургаадугаар сарын 3-ны байдлаар зургаан тохиолдол/

Эх сурвалж: CTV, Монцамэ

Мэдээ уншаад таалагдсан бол Like дарна уу. Танд баярлалаа
Сайт таалагдаж байвал Like дарна уу. Танд баярлалаа
Сэтгэгдэл
АНХААРУУЛГА : Уншигчдын бичсэн сэтгэгдэлд CONTROL.MN хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 77008912 утсаар хүлээн авна
Төстэй мэдээ
Шинэ мэдээ
Санал асуулга
ХАНШИЙН ЗӨРҮҮ ТАНД ХЭР ЗЭРЭГ ДАРАМТ БОЛЖ БАЙНА ВЭ?