МСНЭ-ийн 18 дугаар Их Хурлын үеэр найман сэтгүүлч үг хэлэх эрх авсан байв. "Цахиур.мн" сайтын Бүдрагчаа, 88,3 радиогийн найруулагч Анжгай нарын цөөн сэтгүүлч МСНЭ-ийн удирдлагад талархсан бол, үлдсэн олонхи нь шүүмжлэлтэй хандлаа. - Сэтгүүлчид ажиллах хууль эрх зүйн орчин муудсан. Шүүх, цагдаа, эрүүгийн цагдаагийн алба хэвлэл мэдээллийнхний ажиллах нөхцөлийг бүх талаар хавчиж, хориглож цагддаг. Энэ талаар МСНЭ-ийн удирдлага ажиллаж чадсангүй гэж Оюунчимэг хэллээ. - Би МСНЭ-ийн энэ Их хурлыг зориуд зорьж ирсэн. Юу хийсэн гэж ярихыг сонсох гэж. Илтгэлийг сонслоо. Авах юм алга. МСНЭ-ийн удирдлагад, хийсэн гэх ажилд нь маш их шүүмжлэлтэй хандаж байна. Дөрвөн жилийн дараа унтарсан сэтгүүлчдийн байгууллагаа хүлээн авах нь. Шинэ удирдлагыг хуучин баг дахин гартаа оруулахаар хайрцагласан тухай дуулдана. Энэ бүхнийг таслан зогсоох ёстой. Сайн сэтгүүлч биш, сайн менежерийг олж сонгоё гэж сэтгүүлч Даваадорж бусдыгаа уриаллаа. Хуралд мандаттай 220 сэтгүүлч, нийт 5000 орчим сэтгүүлч, хэвлэл мэдээллийн байгууллагыг төлөөлж хуралдаа оролцож байна. Ирэх 4 жилд МСНЭ-ийг удирдах ерөнхийлөгчид Нинжжамц( УИХ-ын мэдээлэл судалгааны албаны дарга), Отгонбаяр ( Тв5 телевизийн мэдээний албаны дарга, МСНЭ-ийн дэд ерөнхийлөгч), Батхишиг ( НТВ телевизийн мэдээний албаны редактор) нар нэр дэвшүүлээд байна.
