Нийслэлийн Засаг дарга бөгөөд Улаанбаатар хотын Захирагч С.Батболд “Сонгуулийн тухай хуулийн хэрэгжилтийг хангах зарим арга хэмжээний тухай” А/722 дугаар захирамж гаргалаа.
Захирамжийн дагуу Сум, дүүргийн иргэдийн Төлөөлөгчдийн Хурлын ээлжит сонгуулийн санал авах өдөр буюу 10 дугаар сарын 19-ний өдөр нийтийг хамарсан арга хэмжээг бүртгэж, зөвшөөрөл олгохгүй байхыг нийслэл, дүүргийн Засаг даргын Тамгын газарт даалгалаа. Соёл, урлагийн газарт соёл урлаг, үзвэр, спортын арга хэмжээ гэх мэт олныг хамарсан аливаа арга хэмжээ зохион байгуулахгүй байхыг анхааруулсан байна. Мөн энэ өдөр гарч болзошгүй гэмт хэрэг зөрчлөөс урьдчилан сэргийлэх, замын хөдөлгөөний ачааллыг бууруулах, иргэдийн сонгуулийн идэвхийг дээшлүүлэх зорилгоор нийслэлийн нутаг дэвсгэрт үйл ажиллагаа явуулж байгаа захууд болон худалдааны төвүүдийг сонгууль авах 19-ны өдөр амраахаар болжээ. Сонгууль авах болон сонгуулийн дүн гарах өдрүүдэд согтууруулах ундаа зарахгүй байхыг анхааруулжээ.
А.ГАНТУЯА
