Путин салбарын сайд нараа үе үе ингэж ганцаарчлан дуудаж уулзан, телевизийн камерын өмнө "чичрүүлдэг". Хаа нэг Медведевийг дуудна, тэр нь нэр, ёс төдий. Бусдыг нь бол сургана, үүрэгдэнэ. Өөрийнхээ хүчийг мэдрүүлнэ, гол нь. Мэдээлэл сонсож буй дүр наанаа эсгэнэ. Цаанаа, өрсөн сценарийн дагуу бүх зүйл өрнөдөг гэж Оросын сөрөг хүчнийхэн дурддаг. Гэхдээ Путин тийнхүү дуудах, үүрэг даалгавар өгөх бүрэн эрхтэй. Яагаад гэвэл Орос орон бол ерөнхийлөгчийн засаглалтай.
Харин Монголын хувьд Парламентын тогтолцоотой учир ерөнхийлөгч зөвхөн сонсож мэдээлэл авах, түүндээ тулгуурлан холбогдох яам тамгын газарт чиглэл, зөвлөгөө өгөхөөс хэтэрдэггүй. Баттулга гарч ирлээ гээд л өөр болчихдоггүй юм бол. Баттулга хэнийг ч дуудаж уулзах эрхтэй. Бүр УИХ-ын дарга, ерөнхий сайдыг ч. Үүний дагуу АТГ-ын дарга Энхжаргал, Хөдөө аж ахуйн сайд Сэргэлэн нарыг ойрхон дуудаж уулзлаа. Дуудагдах хүн олон. Яг одоохондоо бол сонирхолтой л байна. Уулзалтаа фэйсээр дамжуулж буй нь олон нийтэд хүрч, таалагдаж байна. ОУВС-ийнхныг хүлээн авахдаа хэлсэн үг нь харин жинтэй сонсогдсонд олон нийт талархаж буйг сошиалаас анзаарч болно. Эхний үйлдлүүдээрээ Х.Баттулга олигархийн талд биш, ард иргэдийн талд байгаа шүү гэдгээ бага багаар мэдрүүлж байна гэж ажиглагчид дүгнэх болов.
Тэр уул тахиж зуныг барсангүй. Шагнал тарааж, найрыг хөгжөөсөнгүй. Айлчлалын тов гараагүй учир зугаалгад мордож, төсөв мөнгийг үрэн таран хийсэнгүй. Маш энгийн, ажил хэрэгч, ард түмний санаа зовсон зүйлийг эрх баригчдаас нэхсэн ийм дүр төрхийг эхний сард үлдээлээ. Мэдээж Путиныг яаж ч дуурайсан Баттулга бол Баттулгаараа л үлдэх нь ойлгомжтой. Тэр Монгол улсын өмнөх 4 ерөнхийлөгчидтэй адил байхыг огт хүсэхгүй байна. Ялангуяа улс орноо, ард иргэдээ өмгөөлөх сэтгэлтэй байгааг нь мэдрэх нь хамгийн олзуурхууштай санагдав.
Тоймч Ц.ЭНХБАТ
