Хэнтий аймгийн Батноров сумын засаг дарга Г.Тайванжаргал нутаг усаа хамгаалж явсныхаа төлөө хэвтэрт ортлоо зодуулжээ.
Хэнтий аймгийн Батноров суманд иргэд нь гадны женжүүдтэй нийлж өнгөт чулуугаа түүх нь энгийн үздэгдэл болжээ. Харин Г.Тайванжаргал тэднийг эсэргүүцэн тэмцсэнийх нь төлөө түүнийг зодож танхайрчээ. Тэрээр нүдний хагалгаанд хүртэл ороход хүрсэн байна
Гэвч өнөөдөр түүний эрүүл мэндээрээ хохирон байж тэмцсэн тэмцлийг төр засаг, эрх мэдэлтнүүдийн хэн нь ч олж анзаарч, хэн ч ямар нэгэн шийдвэр гаргасангүй. Бүр аймгийн засаг дарга нь хүртэл таг дуугүй байгаад иргэд, олон нийт бухимдаж байна.
Энэ талаар Хэнтийн ймгийн Батноров сумын иргэн, яруу найрагч С.Шүрэнцэцэг цахим хуудаснаа нийтэлжээ. Тэрээр
"Сумыг тойроод явбал хөрсөөр нь эргүүлж нүх сүв болгосон газрууд хаа сайгүй хэдэн га-гаараа таарна. Өдрийн хоолоо олох гэж чулуу ухдаг иргэдийн ул мөр энэ үйлдлээс болж сүүлийн хэдэн жил ган тасархаа больсон. Чулуу чинь тэнгэрээс хөрсөнд чийг татдаг, хадгалдаг ганц судас нь гэдэг биз дээ... Тэгвэл эх нутгаа хөрсөөр нь эргүүлэн байж, тэнгэр газрын амь тасдан чулуу түүж хоногийн хоолоо залгуулдаг иргэд, тэдний түүсэн чулууг худалдан авч хилээр гаргадаг, олны дунд аль хэдийн "чулууны босс" нэртэй болсон эх орноо цөлмөгсөдтэй хийдэг тооцоо, хүлээлгэдэг хариуцлага гэж төрийн болон хууль хяналтын байгууллага алинд нь ч байдаггүй л юм байхдаа... Магадгүй энэ чулууны наймаа бас нэгэн сүлжээ болоод бүгдээрээ орооцолдчихсон уу... Арга хэмжээ авдаг эрхтэн тушаалтан хайрлаж хайхардаг хүн байдаггүй юм бол байгаль дэлхий өөрийгөө хамгаалах л байх даа хөөрхий..."
хэмээн харамсангуй бичжээ. Мөн тэрээр Чулуу наймаалж хөлжигсөд танаа...хэмээн хаяглаж Алаг чулууны шивнээ нэртэй цуврал шүлэг хүртэл тэрлэжээ.
АЛАГ ЧУЛУУНЫ ШИВНЭЭ
Талын Монголын хөрсөнд чулуу биеийг олсон би
Таван зоосны өртгөөр хил давж нүүсэн бид
Тавилан заяандаа гомдож нутгаа санаад уйлдаг би
Тал бүрээсээ өөлүүлж тансгийн зэрэгт багтсан бид.
Эх нутгаа чимж энгэрт нь ээл болсон
Эцэг тэнгэрээ шимж хөрсөнд чийг татсан
Энгэр газарт эрхэлж цэцгэнд нь сүү болсон
Эрт галавын цагаас хүүхдийн тоглоом байсан.
Би уг нь Монгол чулуу
Бэл дагасан хүн чулуу
Нутгаа санадаг амьд чулуу
Нулимсгүй уйлдаг алаг чулуу.
Эх нутагтаа дэндүү эрх өссөн
Энэ газар би дэндүү их зовсон
Элэг бөөрөө нүхлүүлж энгэрийн чимэг ч болсон
Иртэй мэсэнд ч өртөж хэлбэр галбираа ч сольсон.
Алттай нийлж сондор ч болсон
Амттанд багтаж ширээ ч чимсэн
Ар өврөөсөө өөлүүлж ч үзсэн
Гар дамжин тэнэж ч явсан.
Голоор минь хэд хуваалаа ч нутгаа л санадаг
Гоё гоёын тэргүүн байлаа ч нугаа л үгүйлдэг
Салхитай нь эрхэлж өссөн сайхан Монголдоо
Санаа байгаад ч би гүйгээд очиж чадах биш дээ.
Би уг нь Монгол чулуу
Бэл дагасан хүн чулуу
Нутгаа санадаг амьд чулуу
Нулимсгүй уйлдаг алаг чулуу.
Чулуу бол газрын чийгийг хадгалж байдаг учраас чулуу түүх нь ган болох эсрдэл дагуулдаг гэж эрдэмтэн судлаачид онцолсон байдаг юм. Тиймээс нутгийнхаа чулууг түүж харийнханд арилжиж байгаа энэ "чулууны бизнест" цэг тавих болсныг энэ хэрэг сануулж байна.