Цагдаагийн бие бүрэлдэхүүн гэмт хэрэгтэй тэмцдэг. Хүнд хэцүү нөхцөлд ажилладаг. Ард иргэдээ гэмт хэргээс, гэмт хэрэгтнээс ямагт сэргийлдэг. Үүнд нь талархалтай байдгаа, дуулгая. Гэхдээ сүүлийн үед цагдаагийн байгууллагын удирдах дарга нар захиалгаар үйлчилдэг болсон тухай таагүй мэдээ цацагдаж эхэллээ. УИХ-ын дарга ингэж хэлэхэд хүрсэн нь нийгмийг тодорхой хэмжээгээр цочоолоо. Энэ үйл явцтай давхцаад, иргэн Түвшинжаргал гэгч эмэгтэйг баривчлахад цагдаагийн байгууллагын дарга Чингис гар бие оролцжээ гэж нийгэм хардаж эхэллээ.
Үйл явцыг эргэж харвал, дээрээс чиг үүрэг авсан байх магадлалтай. Ингэж үзэх хэсэг ч бий болжээ. Тэгээд ч түүний хэвлэлд өгсөн ярилцлага ингэж хардах эх үүсвэр тавьжээ. Мэдээж генерал ч гэсэн үүрэг даалгавар өгвөл, биелүүлж таараа. Энэ бол цэргийн амьдрал.
Гэхдээ л дарга хүн шат дарааллаа сайн мэдмээрсэн. Ядаж хэлэх үгээ цэнэмээр санагдсанаа нуугаад яах вэ. Удирдах хүн яагаад, шууд өөр лүүгээ галын цэгийг татах үг хэлэв? Яагаад, өмнөх дарга нарын адил зангараг зааж " Хэрэг явдлыг судалж үзье. Одоохондоо мэдээлэл аваагүй байна. Ямар нэгэн эндүүрэл гарсан байхыг үгүйсгэхгүй" гээд эвтэйхэн хэлж чадахгүй байна вэ? гэж эргэцүүлэх хүн олон. Хөхүүл эмэгтэйг баривчилсны дараа шуугиад эхэлмэгц, "Надад нэг настай хөхүүл хүүхэдтэй эмэгтэй гэж мэдээлээгүй" гэж хэвлэлд ярилцлага өгсөн нь байдлыг шууд хурцатгасан.
Өөрөө захиалагч биш байлаа гэтэл шууд оролцоотой гэдгээ илчилсэн үйлдэл боллоо гэж ажиглагчид дүгнэж байна. Гэмт хэрэгтэй тэмцэх нь зөв. Гэхдээ хуулийн хүрээнд ажиллах ёстой юм биш үү. Монголын хуульд "Нялх хүүхэдтэй буюу, хоёр нас хүрээгүй хүүхэдтэй эмэгтэйг хорьж болохгүй" гэсэн заалт байдаг тухай УИХ-ын гишүүн О.Баасанхүү сануулж байна.
Монголын Цагдаагийн байгууллага бас хууль зөрчжээ. Тушаал, хууль хоёрын аль нь дээрээ байдаг юм бэ?
Нийтлэлч Ц.ЭНХБАТ