Хууль, хүчний байгууллагын удирдлагууд улс төрийн захиалгаар үйл ажиллагаагаа явуулдаг гэдэг шүүмжлэлд өртөөд удаж байна. Тэднийг улстөрчдийн халаасны хүмүүс ч болсон гэж ил далд ярих, бичих болов. Тэд ихээхэн дарамттай ажиллаж байгаа бололтой. Энэ хавар бүр ч их ачаалалтай ажиллана гэж хөндлөнгийн шинжээчид дүгнэж байна. Эхнээсээ няцаж эхэлжээ.
АТГ-ын дарга Н.Ганболд маш чухал, эгзэгтэй үед ажлаа өгөхөө мэдэгдлээ. Тэр өргөдлөө бичсэн байна. Тэр АТГ-ыг орхихоор бүрмөсөн шийджээ. Тэтгэврийн нас нь ч болжээ. Амар тайван амьдрах хүсэл түүнд байгаа нь, мэдээж. Дээрээс гэхээс, илүүтэйгээр ар гэр, ах дүү нар нь түүнийг "шахсан" байх магадлалтай. Тэр ухаалаг шийд гаргалаа. Гэвч түүнийг няцлаа гэж нийгэм олон харж байна.
Түүний дараагийн хүн бол ЦЕГ-ын дарга Р.Чингис. Түүнд дарамт шахалт үзүүлж эхэлсэн. Шууд өөрт нь үзүүлэхээс гадна, ерөнхий сайд Ч.Сайханбилэгийг барьцаалсан. Р.Чингисийг авч хаяхгүй бол Ч.Сайханбилэгийн засгийн газрыг огцруулна. Ийм шахалтыг үзүүлсэн тул Р.Чингисийн суурь бүхэн ганхсан гэж хэлж болно. Түүнийг MSC-ийн төлөөний хүн гэж цоллох болсон. Монголын цагдааг нэг компанийн эрх ашигт үйлчлүүлсэн гэсэн үндэслэлээр түүнийг зайлуулан шахах ажлыг эхлүүлсэн гэж ойрын эх сурвалж мэдээллээ. Одоо Ч.Сайханбилэгийн хувьд ЦЕГ-ын дараагийн даргыг, Ц.Элбэгдорж ерөнхийлөгчийн хувьд АТГ-ын даргаар хэнийг УИХ-д оруулахаа шийдэх цаг болжээ. Хууль, хүчний байгууллагын бие бүрэлдэхүүнд ч цаашид ихээхэн өөрчлөлт орох төлөвтэй.
Нийтлэлч Ц.ЭНХБАТ