Хан-Уул дүүргийг эзэнгүй дүүрэг гэж үздэг болжээ. Баянхонгорыг Женко Х.Баттулга, Сэлэнгийг С.Баярцогт, Төв аймгийг М.Энхболд нар өөрийн болгон "тамгалсан" гэдэг.
Тэгвэл Хан-Уул дүүрэгт ийн тамгалсан, ноёрхлоо тогтоосон ноён байхгүй гэнэ. Тиймээс Хан-Уул дүүргийг сонгох нь нэр дэвшигчдэд хялбаргүй ч, өрсөлдөхөд таатай гэж ажиглагчид дүгнэсэн байдаг.
2012 онд Хан-Уул дүүрэг "цэнхэртсэн". УИХ-д Лу.Болд, Ц.Оюунгэрэл нар АН-аас дэвшиж сонгогдсон. Энэ жил АН-аас Лу.Болд, МАН-аас Ц.Нямдорж, Д.Сарангэрэл, МАХН-аас Ц.Оюунбаатар нар дэвших нь тодорхой боллоо. Энэ нэр дээр бусад намаас дэвших хүмүүс нэмэгдэнэ. Хоёр мандаттай энэ тойргоос 2 л нэр дэвшигчийг сонгоно.
Одоогийн байдлаар Хан-Уул дүүрэгт нэр дэвших УИХ-ын гишүүн Ц.Нямдорж, Д.Сарангэрэл, Ц.Оюунбаатар, Лу.Болд нарын дор хаяж 2 нь дан дээлээ тайлах боллоо. Нөгөө намаас нэр дэвшигчдээс болон, иргэдийн дэмжих байдлаас хамаарч нөгөө хоёр нь "дан дээлтэйгээ" үлдэх үү, үгүй юу? гэдэг шийдэгдэнэ. Энэ бол сонгогчдын эрх мэдлийн хүрээний асуудал. Өрөөнөөсөө гаралгүй 4 жил ямбалсан эрхтэн дархтануудыг "ташуурдах" цаг нь ард иргэдэд олдох нь энэ.
Энэ жил нэр дэвшигчид мөнгө тарааж чадахгүй. Шударга үнэн үгтэй гэх Ц.Нямдорж, ТВ5-ийн гэх тодотголтой Д.Сарангэрэл, Шударга ёс гэж яригч Ц.Оюунбаатар, Монголын төр "Хор, Хов, Хог"-ноосоо салах цаг болсон гэгч Лу.Болд нар толгойлон Хан-Уул дүүрэгт өрсөлдөх нь байна шүү, иргэд сонгогчид оо.
Тэднийгээ ажиглаж, судалцгаавал, зөв сонголт хийхэд тань нэмэр болно. CONTROL.MN мэдээллийн сайт ч та бүхэнд нэр дэвшигчдийн тухай мэдээллийг цаашид хүргэх болно.
Нийтлэлч Д.ЭНХТҮВШИН
