Эмч нар алдаа эндэл гаргах нь бий. Санаатайгаар хийдэг гэж санахгүй байна. Ажил мэргэжлийн алдаа гарч байдгийг үгүйсгэхгүй. Түүнийг нь тогтоодог, хянадаг байгууллага бий.
Гэхдээ, эмч нараа "яагаад ийнхүү чангалах" гээд байгааг сайн ухаарахгүй л байна. Эмч нарын алдаа эндэгдлээс болоод хүний амь нас, эрүүл мэнд хохирсон тохиолдолд хатуу хариуцлага хүлээлгэх эрүүгийн хуулийн төсөл бэлэн болжээ. Нэг талаас зөв ч, нөгөө талаас аймшигтай сонсогдож буйг нуухгүй. Хариуцлагыг хаана хаанаа өндөрсгөх хэрэгтэй. Үүнтэй санал нэг байна. Хариуцлага ярих гэж байгаа бол эрх ямбыг нь бас давхар хэлэлц. Хүний амь эрсдүүлсэн бол хатуу хариуцлага хүлээх бол, хүний амь аварбал тэр эмчийг яаж дээдлэх вэ? Зуун хүн авраад, нэг хүн дээр эндэл гаргавал, тэр чадвартай эмчийг шоронд хийх үү? Чадвартай эмчээсээ ард иргэд хагацах уу? гэдгийг бодмоор байна.
Эмч нарын сургалт, сургалтын лаборатори ямар түвшинд байна, эмч сувилагч нар хэдэн төгрөгийн цалин авч байна гэдгийг ч ярих хэрэгтэй. Бид бүхэн өвдөхөөрөө эмч, эмнэлэг рүү, хамгаалуулах болохоороо цагдаа хүчний байгууллагад ханддаг шүү дээ.
Энэ хууль батлагдвал ажлаас гарна гэх эмч нарын тоо өдрөөс өдөрт өсөж байна гэж ойрын эх сурвалж мэдээллээ. Тэднийг ажлын байраа орхиод одчихвол, энэ хуулийг өргөн барьсан хуульчид, баталсан гишүүд очиж эмчлэх үү?, тэгээд. Хуулийг батлах гэж гаргадаггүй, хэрэгжүүлж мөрдөх гэж гаргадаг.
Ц.БАТТУЯА
