Монголын анхны хүүхдийн продакшин гэгддэг "Төгс хөгжил" продакшин нь хүүхэд багачуудыг хүсэл мөрөөдөл зорилгодоо хүрэх, өөрийгөө хөгжүүлэх тал дээр онцгой анхаарч уран бүтээл туурвидаг гэдэг. Гэвч энэ нь худлаа бололтой. Тус продакшин нь хүүхдүүдэд зориулсан контент гэх дэлгэцийн болон богино хэмжээний уран бүтээлээр хүүхэд багачуудыг садар самуунд уруу татаж буруу үлгэр дууриалал үзүүлж байна.
"НАНДИН НАС" ОАУСК
Боловсрол телевиз, Dream box телевизээр цацагдаж буй тус киноны наймдугаар анги кинонд оролцон тоглосон хүүхдүүдийг нэг дор нь хөнжилд суулган, “хөзөр дамжуулах” тоглоом нэрийдлээр үнсэлцүүлж буй хэсэг гарав. Үүнээс дүгнэж үзвэл хүүхдүүдэд урлагын бус "Үнсэлцэх" боловсрол олгож байна гэж хэлж болох юм. Өсвөр насны охид хүсээгүй жирэмслэлтэд өртөж, бэлгийн хүчирхийллийн золиос болсоор буй энэ үед олон нийтэд садар самуун агуулга бүхий кино гаргах нь ёс зүйд нийцэх үү ?
ХИЙЦГҮЙ АТАМАНУУД
Уг богино хэмжээний теле зохиомж дээр микро автобусаар зорчигчдийг тээвэрлэж буй талаар гарна. Гэхдээ хэт их хараалын үг хэллэг агуулсан, зодоон, залилан, архидалт зэргийг харуулж байна. Энэ нь дугуйланд суралцаж байгаа болон оролцон тоглож буй хүүхдүүдэд хичээл биш хэрүүл зааж байна.
АМАР БАЙНА УУ ТЕЛЕ ЗОХИОМЖ
Энэхүү зохиомж нь сар шинийн баярын дугаарт зориулан бүтээсэн. Монгол ёс заншил уламжлалыг хэт гуйвуулсан байна. Тухайлбал: Шинийн нэгний өглөө мөр гаргах ёсонг тохуурхаж. Гэр бүлийн хэрүүл маргааныг сурталчилж хадам ээж нь бэрээ алагчилж үзэж буй талаар харуулж байна.
Энэ мэтчилэн тус продакшны бүтээсэн ихэнх контент, зохиомжууд нь хүүхдүүдийн ёс суртахуунд ноцтой нөлөөлхүйц, архи тамхи, садар самуун, хэрүүл маргааныг сурталчилсан агуулгатай байна.
Иймд цаашид хийж буй бүтээлүүддээ шүүлтүүр хийх хэрэгтэйг сануулж байна.
Т.Хуншагай
