Жил бүрийн 5 дугаар сарын 6-нд хоолны дэглэм баримтлахгүй байх олон улсын өдрийг тэмдэглэн өнгөрүүлдэг.
Энэ өдрийг 1992 оноос Mary Evans Young гэх эмэгтэйн санаачлагаар тэмдэглэж иржээ. Mary бол Английн "Diet Breakers" буюу “Хоолны дэглэмийг няцаагч” бүлгийн тэргүүн бөгөөд өөрөө өмнө анорексия буюу мэдрэлийн шалтгаантай хоолны дуршил буурах өвчнөөр шаналж байсан учраас хүмүүст өөрийн гэсэн гоо үзэсгэлэн, бие хүн гэдгийг ойлгуулах ажилд идэвхтэй зүтгэж иржээ. Өнөөдөр хоолны дэглэмийг хэт баримтлахын сөрөг үр дагаврын талаар мэдлэггүй байдал ихэсч байгаа явдлыг өөрчлөх буюу байгалиас өөрт заяасан унаган төрх байдал, биеийн галбираа хүлээн зөвшөөрөх, өөрийгөө хүндэтгэх, хоолны дэглэм баримталж биш зохистой хооллож эрүүл амьдрах тухай ухагдахууныг олон нийтэд таниулах зорилготой өдөр юм.
А. САЯН
