Алтанбулаг боомтоор Монгол Улсад орж ирсэн ачаа тээврийн жолоочоос коронавирус илэрч, Монгол Улсад "COVID-19"-ийн батлагдсан тохиолдол нийт 288 болжээ.
Энэ талаар ХӨСҮТ-ийн ерөнхий захирал Д.Нямхүү ЭМЯ-ны өнөөдрийн ээлжит хэвлэлийн хурлын үеэр мэдээллээ.
"Уг жолооч нь 39 настай Казахстан улсын иргэн юм. Түүнийг ХӨСҮТ-д эмчилж байна. Улсын хэмжээнд өчигдөр 709 хүнд шинжилгээ хийснээс 708-д нь вирус илрээгүй. Үүнд энэ сард тусгай нислэгээр эх орондоо ирсэн иргэдийн давтан шинжилгээний хариу багтаж байгаа" гэлээ.
Мөн коронавирусээр халдварласан 20-24 насны 3 иргэн эдгэрч, өчигдөр ХӨСҮТ-ээс дараагийн шатны ажиглалтад шилжсэн байна. Ингэснээр Монгол Улсад батлагдсан 288 тохиолдлоос нийт 217 нь эдгэрлээ. Одоогоор ХӨСҮТ-д 71 хүн эмчлүүлж байгаа аж.
Эх сурвалж: МОНЦАМЭ
