Коронавирусийн халдварын батлагдсан тоогоор Латин Америкийн бүс нутаг дэлхийд тэргүүлж эхэлснийг Ройтерс агентлаг Ням гарагт мэдээлжээ.
Латин Америкт бүртгэгдсэн нийт тохиолдлын тоо одоо 4,327,160 байгаа бол АНУ, Канадад нийлээд 4,308,495 хүрээд байна. Харин улс нэг бүрээр нь авч үзвэл халдварын тохиолдол болон нас баралтын тоогоор дэлхийд тэргүүлж буй нь АНУ юм. Тус улсад 4.2 сая хүн халдвар авч, 146,000 орчим хүн нас бараад байна.
Харин Бразил улсад 2.4 сая халдварын тохиолдол бүртгэгдэж, 87,000 иргэн нас барсан байна.
Латин Америкийн Мексик, Перу, Чили улсууд хамгийн олон халдварын тохиолдолтой дэлхийн 10 улсын тоонд багтаж байна.
Гэхдээ оношлох хүчин чадал муутай улс орнуудад бодит байдал дээр илүү олон хүн өвчилсөн гэж мэргэжилтнүүд үзэж байгаа юм.
Коронавирусийн халдварын батлагдсан тохиолдол өнөөдөр дэлхий даяар 16.1 саяд хүрээд байна.
Эх сурвалж: Reuters