ХӨСҮТ болон ЗӨСҮТ, Дархан- Уул аймгын вирус судлалын лабораторид өнгөрсөн 24 цагт 630 хүний сорьцод шинжилгээ хийснээс тусгаарлалтад байсан хоёр хүний давтан шинжилгээнд коронавирус илэрсэн талаар ЭМЯ-ны өнөөдрийн ээлжит мэдээллийн үеэр ХӨСҮТ-ийн захирал Д.Нямхүү мэдээлэв.
Тус иргэд нь 50 настай эмэгтэй, 14 настай эмэгтэй аж. Ингэснээр Монгол Улсад батлагдсан тохиолдол 291 боллоо. Үүнээс 225 нь эдгэрч дараагийн шатны хяналтанд шилжсэн бол эмчилгээнд 66 хүн байна. Биеийн байдал 62 нь хөнгөн, 4 нь хүндэвтэр байна хэмээн ХӨСҮТ-ийн захирал Д.Нямхүү мэдээллийн үеэр тодотгов.
Харин Истанбул-Улаанбаатарын онгоцоор энэ сарын 10-нд ирсэн 258, Сөүл-Улаанбаатарын онгоцоор ирсэн 262 хүний гурав дахь давтан шинжилгээнд коронавирус илрээгүй. Мөн ХӨСҮТ-д тусгаарласан 3, ажиглан тусгаарлах байранд байгаа 60, Алтанбулаг боомтоор орж ирсэн ачаа тээврийн 26 жолооч, Сэлэнгэ, Дархан-Уул аймагт тусгаарласан 8 хүнд коронавирус илрээгүй ажээ.
