Маргааш буюу 5 дугаар сарын 13-ны өдөр Цагдаагийн байгууллагын "Нээлттэй хаалганы өдөр" 09-17 цагийн хооронд Чингисийн талбайд болно.
Өдөрлөгт Цагдаагийн Ерөнхий газар, Улаанбаатар цагдаагийн хүрээний газар хэлтэс, Хууль сахиулахын их сургуулийн Цагдаагийн болон Ахлагчийн сургууль, Улсын бүртгэл, статистикийн ерөнхий газрын харьяа нэгж тус тус оролцох ажээ. Эдгээр байгууллагууд өөрсдийн үйл ажиллагааны чиглэлээ танилцуулж, иргэдэд хандсан үйлчилгээ үзүүлэхээс гадна мэргэжлийн онцлогийг харуулсан нохойн үзүүлэх тоглолт, алба хаагчдын бие хамгаалах, гардан тулааны үзүүлэх тоглолтыг иргэд олон нийтэд сонирхуулах юм байна.
Түүнчлэн Галт зэвсгийн тухай, Гэрээт харуул хамгаалалтын тухай хууль, тээврийн хэрэгсэл жолоодох эрхийн лавлагаа, үнэмлэх олгох, тээврийн хэрэгсэл жолоодох эрхээ хасуулсан иргэдэд сургалт явуулж, нийтлэг асуултад хариулж, зөвлөгөө өгч, гарын авлага тараах ажээ.
А.САЯН