Монгол Улсын гадаад хэргийн яам, Монголын сэтгүүлчдийн нэгдсэн эвлэлээс хамтран зохион байгуулж буй Монгол-Оросын сэтгүүлчдийн хамтарсан форум өнөөдөр анх удаагаа Улаанбаатар хотноо амжилттай зохион байгуулагдаж өндөрлөлөө. Энэхүү арга хэмжээ нь Монгол Улсыг гадаадад сурталчлах хөтөлбөрийн хүрээнд ОХУ-ын Бүх буриад, Улаан-Үд, Эрхүү зэрэг салбарын сэтгүүлчид Монгол Улсад айлчлан, хамтарсан форум хийх зорилгоор зохион байгуулагдсан юм.
Хоёр улсын сэтгүүлчид хамтарсан форумыг зохион байгуулж хоёр орны хэвлэл мэдээллийн салбарын уламжлалт болон өнөөгийн харилцаа хамтын ажиллагааг дүгнэж, цаашид өргөжүүлэн хөгжүүлэх, мэдээлэл, нэвтрүүлэг болон сэтгүүлчид харилцан солилцох талаар илтгэл тавин хэлэлцүүлж, хэлэлцүүлэг өрнүүлэн халуун дотно уур амьсгалтай боллоо.
Уг форумд Монголын сэтгүүлчдийн нэгдсэн эвлэл, Монцамэ агентлаг, орос хэлээр нийтлэл, нэвтрүүлэг бэлтгэдэг хэвлэл мэдээллийн байгууллагын төлөөлүүдээс гадна сэтгүүлч бэлтгэдэг их дээд сургуулийн эрдэмтэн судлаачид нийт 50 гаруй төлөөлөл оролцсон юм.
ОХУ-ын сэтгүүлчдийн төлөөлөл айлчлалынхаа хүрээнд Ерөнхий сайд Ч.Сайханбилэг, Гадаад хэргийн сайд Л.Пүрэвсайхан болон яамд агентлаг, төрийн бус байгууллагуудын төлөөлөлтэй уулзаж Оюутолгой, Эрдэнэт үйлдвэртэй танилцах аялал хийх юм.
Х.АЯЛГУУ