Хан-Уул дүүргийн нутаг дэвсгэр, хуучин танктай хөшөө байсан авто замын уулзварт “Торгоны зам” нэртэй жингийн таван тэмээ цувран алхаж яваа баримал бий. Монгол соёл, нүүдэлчин Монголчуудын тухай өгүүлэх энэхүү баримлыг улам өнөр болгохоор уран барималч Ё.Далх-Очироор ахлуулсан барималчид ажиллаж байна.
Тэд “Торгоны зам” нэртэй цогц, орон зайн барималд нэмж 4 тэмээг байрлуулахаас гадна тэмээн цуваагаа хөтөлж яваа морьтой хүн, жингийн цувааг дагаж яваа монгол банхар зэрэг том цуваа байдлаар хот руу жин тээж, нүүж орж ирж байгаагаар хийхээр болжээ. Одоогоор ажлын гүйцэтгэл 80 гаруй хувьтай яваа аж.
“Торгоны зам” баримал нь Ази–Европын хооронд эдийн засаг , соёлын солилцооны хөгжлийг бий болгоход чухал үүрэг гүйцэтгэсэн монгол тэмээний хүчирхэг бодит дүр төрхийг нээн харуулж , тэмээн жингийн цуваа бүхий хэлбэр хөдөлгөөн нь эд баялгийг тээн улсын нийслэл руу орж байгаа бэлгэдлийг харуулдаг билээ.
А.САЯН
